Qaraǵandy oblysynda kólikterdiń betpe-bet túıisýinen bir adam qaza boldy
QARAǴANDY. QazAqparat - Qaraǵandy oblysynda júk kóligi men jeńil mashına soqtyǵysty, saldarynan bir adam qaza boldy, dep habarlaıdy QazAqparat tilshisi.
27 maýsym kúni saǵat 14.00 shamasynda Qaraǵandy-Aıagóz-Buǵaz tasjolynyń Buqarjyraý aýdanyna jaqyn tusynda aldyn ala boljam boıynsha, «VAZ» kóliginiń júrgizýshisi keri baǵyttaǵy jolaqqa shyqqan, qarsy kele jatqan júk kóligin kórgennen keıin óz jolaǵyna qaıta oralyp úlgermegen. Kólikter betpe-bet soqtyǵysqan.
«1976 jyly týǵan er adam kólikte qysylyp qalǵan. Oqıǵa ornyna jetken Tótenshe jaǵdaılar departamentiniń qyzmetkerleri temirdi bosańsytyp, onyń óli denesin alyp shyqty», - dep habarlady Qaraǵandy oblysy boıynsha TJD baspasóz hatshysy Aıdana Júnis.
Polıtsııa jol-kólik apatynyń mán-jaıyn anyqtaýda.
