Qaraǵandy oblysynda kólikpen júrýge elektrondy ruqsat talap etilmeıdi
QARAǴANDY. QazAqparat - 4 mamyrdan bastap Qaraǵandy oblysynyń Temirtaýdan basqa eldi mekenderinde elektrondyq ruqsatnama kúshin joıady. Biraq qala ishinde ǵana kedergisiz júrýge bolady, dep habarlaıdy QazAqparat tilshisi.
Qaladan shyǵý úshin burynǵysynsha elektrondyq derekter bazasynda málimetterdiń bolýy talap etiledi. Oblys qalalary men aýdandary arasyndaǵy blok beketter óz jumysyn jalǵastyrýda.
Esterińizge sala keteıik, 4 mamyrdan bastap Qaraǵandy oblysynda, Temirtaýdan basqa qalalar men aýdandarda halyqqa qyzmet kórsetetin birqatar nysandar jumysyn qaıta bastaıdy.
Olardyń qatarynda shashtaraz men sulýlyq salondary (aldyn ala jazylý boıynsha), aqsha aıyrbastaý pýnkti, aýdany 500 sharshy metrden aspaıtyn azyq-túlik emes dúkender, fotosalondar, gúl dúkenderi, gazet dúńgirshekteri bar.
Aldyn ala jazylý boıynsha stomatologııa kabıneti men klınıkalar jumys isteı alady. Mıkroqarjy jáne saqtandyrý uıymdary, jarnama agenttikteri, jyljymaıtyn múlik kompanııalary, baspahanalar, lombardtar, aqparattyq-kommýnıkatsııalyq tehnologııalar kásiporyndary, jeke sot oryndaýshylary, zańdy jáne notarıaldyq keńseler qyzmetin qaıta iske qosady. Dalada jeke sporttyq sabaqtar men jattyǵýlarǵa ruqsat etiledi.
29 sáýirde Premer-mınıstr Asqar Mamınniń tóraǵalyǵymen QR Prezıdenti janyndaǵy tótenshe jaǵdaı rejımin qamtamasyz etý jónindegi memlekettik komıssııanyń otyrysynda karantındik sharalardy jeńildetý týraly sheshim qabyldandy.
