Qaraǵandy oblysynda kólik polıtseılerdi qaǵyp ketti
QARAǴANDY. QazAqparat - «Qyzylorda - Pavlodar» avtojolynda «Audi-100» avtomobıliniń 55 jastaǵy júrgizýshisi polıtseılerdiń qyzmettik kóligine soǵyldy, dep habarlaıdy QazAqparat tilshisi.
Qaraǵandy oblystyq ІІD ókilderiniń aıtýynsha, jol-kólik oqıǵasy 13 shilde kúni 19:00 shamasynda bolǵan. Aldyn ala málimetterge qaraǵanda, «Audi-100» júrgizýshisi júk kóliginiń janynan ozyp shyǵa bergende, polıtseılerdiń jol shetinde turǵan «VAZ 21213» qyzmettik avtomobılin qaǵyp ketken. Polıtseıler ol kezde oǵan deıin bolǵan jol apatyn rásimdep jatqan.
«Apat saldarynan eki polıtsııa qyzmetkeri kóptegen jaraqattar alyp, Abaı qalalyq ortalyq aýrýhanasyna jetkizildi. Sondaı-aq polıtseılerdiń mashınasynda bolǵan 26 jastaǵy jigit jáne «Audi-100» avtomobıliniń júrgizýshisi de zardap shekti», - dep málimdedi vedomstvo ókilderi.
Fakti boıynsha QR Qylmystyq kodeksiniń 345-babynyń 1-bóligine sáıkes sotqa deıingi tergep-tekserý amaldary júrip jatyr.
Tıisti saraptamalar belgilendi.
