Qaraǵandy oblysynda kólik qaqqan 27 jastaǵy jigit kóz jumdy
QARAǴANDY. QazAqparat – Qaraǵandy oblysynyń Osakarov aýdanynda júrgizýshi jigit polıtseılerdiń aýa raıynyń qolaısyzdyǵyna baılanysty jolǵa shyǵýǵa tyıym salǵanyna qaramastan trassaǵa shyǵyp, adam qaǵyp ketti, dep habarlaıdy QazAqparat tilshisi.
17 qańtarda Qaraǵandy oblysy Osakarov aýdanynyń aýmaǵynda «Ekaterınbýrg – Almaty» avtojolynda «Toıota Kamrı» avtokóliginiń 25 jastaǵy júrgizýshisi Qaraǵandy qalasynyń 27 jastaǵy turǵynyn qaǵyp ketti. Apat saldarynan ol jaraqat alǵan.
Jol-kólik oqıǵasynan keıin «Toıota Kamrı» avtokóliginiń júrgizýshisi zardap shekken adamdy Temirtaý qalasynyń aýrýhanasyna jetkizgen. Alaıda jigit alǵan jaraqatynan kóz jumdy.
«Osy faktige qatysty QK 345-bap 3-bólimi boıynsha sotqa deıingi tergeý bastaldy. «Toıota Kamrı» kóliginiń júrgizýshisi polıtsııa qyzmetkerlerine baǵynbaı, jolǵa shyǵyp ketkeni úshin QR QK 667-babyna sáıkes jaýapkershilikke tartylady», - dep habarlady Qaraǵandy oblysy PD baspasóz qyzmeti.
