Qaraǵandy oblysynda kóktemgi sý tasý kezeńine daıyndyq bastaldy
QARAǴANDY. QazAqparat – Qaraǵandy oblysynda sý tasqyny qaýpi bar aýyldardy aralaý bastaldy. Mamandar ózenderdiń joǵarǵy aǵysyndaǵy topyraqtyń qatý tereńdigin ólsheıdi. Qaýipti ýchaskelerdi kosmomonıtorıng kómegimen anyqtaıtyn bolady, dep habarlaıdy QazAqparat tilshisi.
Sý tasqynyna daıyndyq týraly TJ jónindegi óńirlik komıssııa otyrysynda aıtyldy.
«Oblysta respýblıkalyq Jol kartasy aıasynda sý tasqyny qaýpiniń aldyn alý jáne joıý boıynsha sharalar kesheni júzege asyrylýda. Injenerlik jumystardyń oblystyq jospary bar. Úsh jyl ishinde qorǵanys dýaldaryn salý, sý ótkizý qubyrlaryn ornatý, Soqyr jáne Toqyraýyn ózenderiniń arnalaryn sanatsııalaý boıynsha 69 is-shara iske asyryldy. Bıyl Sherýbaı-Nura ózenin qalpyna keltirý jumystary jalǵasady. 2021-2023 jyldarǵa arnalǵan Jol kartasyna 23 is-shara engizildi», - dedi TJD bastyǵy Murat Qatpanov.
Ol ótken jylǵy jumys týraly esep berdi. 33 aýyl men kentte qorǵanys bógetteri men úıindileri turǵyzylyp, nyǵaıtyldy. 9,1 shaqyrym sý burý arnalary salyndy jáne jóndeldi. Gıdroqurylystardy jóndeýge 970 mln teńgeden astam qarjy jumsaldy.
Vedomstvo basshysy qańtar aıynda TJD jáne Qazgıdromet qyzmetkerleri Nura jáne Sherýbaı-Nura ózenderiniń joǵarǵy aǵysyndaǵy qar ólsheý marshrýttary boıynsha alǵashqy baqylaý jasap ótkenin habarlady. Onyń aıtýynsha, kóktemgi sý tasqyny boıynsha boljamdar jasaýǵa áli erte, jaǵdaı naýryz aıynyń basynda aıqyn bolady.
Tasqyn sýlardan qorǵaý boıynsha oblystyq jospar ázirlendi. TJD qar jamylǵysynyń kosmomonıtorıngi jáne oblys ózenderinde jarylys jumystaryn júrgizý qyzmetterine sharttar jasady. 1 naýryzdan bastap jol qyzmetteri sý qubyrlary men kópirlerdi tazartýǵa kirisýi kerek.
Іri sý qoımalarynan aǵyzý kestesi men kólemi qol rejıminde retteletini málimdeldi.
Komıssııa otyrysynda sondaı-aq habarlandyrý júıelerin jańǵyrtý jospary talqylandy.
Oblys ákimi Jeńis Qasymbek birqatar tapsyrma berdi.
«Qalalar men aýdandardyń ákimderi, qardy jedel shyǵarý qajet-qarajattardy qarastyryp, kásiporyndardy tartyp, osy jumysty jandandyryńyzdar. Sý sharýashylyǵy qurylystaryn erekshe baqylaýda ustaý kerek. Sý qoımalaryn daıyndaýǵa, sýdy aǵyzýdyń ýaqytyly rejımin uıymdastyrýǵa erekshe nazar aýdaryńyzdar», - dep atap ótti aımaq basshysy.
