Qaraǵandy oblysynda kóktemgi sý tasqynynan qorǵaný úshin dambasy salyndy
ASTANA. QazAqparat - Buqar jyraý aýdanyndaǵy Sadovoe aýylynyń mańynda úılerdi keleshekte kóktemgi sý tasqynynan saqtaý úshin arnaıy damba jasalýda, dep habarlaıdy Qaraǵandy oblysy ákimdiginiń baspasóz qyzmeti.
Baspasóz qyzmetiniń málimetterine qaraǵanda, dambanyń birinshi kezegi aıaqtaldy, osy kezde uzyndyǵy 3,6 shaqyrymdy quraıtyn topyraq úıildi.
Búgin Qaraǵandy oblysynyń ákimi Erlan Qoshanov Buqar jyraý aýdanyna qarasty Sadovoe jáne Chkalov aýyldarynda bolyp, aýdanda kóktemgi sý tasqynymen kúresý baǵytynda qandaı jumystar atqarylyp jatqanyn baıqap qaıtty.
«Dambalar Nura jáne Baımyrza ózenderiniń boıynda salyndy», - dep málimdedi aýdan ákimi Shaǵýrashıd Mamalınov aımaq basshysyna.
Búgingi tańda Sadovoe aýylynda 3,6 shaqyrym bóget salyndy, ekinshi kezeńde tabıǵı qıyrshyq tas 3,1 shaqyrym jerge sebilgen. Chkalov aýylynda uzyndyǵy 1,7 shaqyrym topyraq dýal jasaldy. Onda da 98 metr gabıondar ornatylyp, qosymsha taǵy 800 metr gabıondar jasaýǵa baıqaý jarııalandy. Barlyq jumystar 1-shi qarashada aıaqtalady dep josparlanýda. Erlan Qoshanov Sadovoe aýylynyń turǵyndarynan olardyń qorǵaý bógetteri men dýaldardyń qurylysy týraly pikirlerin surady.
«Men munda burynnan beri turyp kelem, jyl saıyn kóktemde bizdiń aýyl tasqyn sýdan zardap shegedi. Biraq osy jyly dambalardyń qurylysy júrgizilip jatqanda aýyl ákimi men aýdan ákiminiń oynbasary árdaıym qurylys ornynda bolyp, barlyq jumystardy qadaǵalap júrdi. Damba óte bıik. Kóktemde aýylymyzǵa qaýip tónbeıdi dep úmittenemiz», - dedi aqsaqal Mızamhan Bultpaıuly.
Sadovoe aýylyndaǵy qorǵaý dýalynyń eni - 6 metr, joǵarǵy bóligi - 2 metr. Bıiktigi - 1,7 metrden 2 metrge deıin jetedi.
Chkalov aýylyndaǵy dambanyń 70 paıyzy tastardan, 30 paıyzy saz ben topyraqtan quralǵan. Nyǵaıtqysh torlar myryshtalǵan symdardan jasalǵan. Barlyq qajetti ólshemder saqtalǵan. Sonymen qatar bul dambalardy bir orynnan ekinshi jerge aýystyrýǵa bolady.
Oblysta 2018-shi jylǵa deıin tasqyn sý saldarynyń aldyn alý boıynsha sharalar jospary qurylǵan. Búgingi tańda Yntymaq aýylynda uzyndyǵy 1 shaqyrym, bıiktigi 1,5 metr qorǵaý dýaly salynǵan.
Belaǵash aýylynda uzyndyǵy 600 metr, eni 2 metr jáne bıiktigi 1 metrden 1,3 metrge deıin jetetin topyraq bógeti salyndy.
Jalpy uzyndyǵy 12 shaqyrymdyq dambalar Botaqara kentiniń mańynda ornalasqan Ǵ. Mustafın jáne Sarytóbe aýyldarynda salynyp, nyǵaıtylyp jatyr.
Sarytóbede sý tasqynynan keıin aýylǵa keler jol bóligi qaıta qalpyna keltirilip, dıametri 1 metr 8 jańa sý ótkizgish saqınalar ornatyldy.
Ǵ. Mustafın kentinde sý ótkizgish aryqtar tazartylýda. Olardyń mańaıynda uzyndyǵy 2 shaqyrym, bıiktigi 2 metr, eni men negizi 5 metr dýaldary salynyp jatyr. Qazirdiń ózinde shamamen 600 metr aýmaq tazartyldy.
Aqtóbe aýylynda uzyndyǵy 5,5 shaqyrym qorǵaý dambasy kúsheıtilip jatyr. Búgingi tańda onyń 4,8 shaqyrymy nyǵaıtyldy.
Sonymen qatar Qarajar aýyldyq okrýginde jáne Rostov aýyldyq okrýginiń Qyzyljar aýylynda da qorǵaý dýaldary ornatylady dep josparlanýda. Barlyq jumystardy merdigerler qarashanyń sońyna deıin aıaqtaýǵa ýáde berip otyr.
Esterińizge sala keteıik, bıylǵy jyly kóktemgi sý tasqynynyń qarqyndy mezgili 14-16 sáýirge týra keldi. Tasqynnyń aldyn alý úshin Samarqand sý qoımasynan 1200 tekshe metr sý jiberýge týra keldi. Sonyń saldarynan Buqar jyraý aýdanyna qarasty Sadovoe jáne Chkalov aýyldaryna sý aqqan bolatyn.
