Qaraǵandy oblysynda kóktemgi sý tasqynyna daıyndyq kúsheıtilýde
QARAǴANDY. QazAqparat - Qaraǵandy oblysynda sý tasqynyna daıyndyq jumystary jalǵasýda. Aımaq basshysy Jeńis Qasymbek Nura jáne Abaı aýdandarynda bolyp qaıtty. Oblys ákimi eldi mekender mańyndaǵy qorǵanys bógetteri men gabıondarynyń jaǵdaıyn bildi, dep habarlaıdy QazAqparat tilshisi.
Qaraǵandy oblysynda Nura jáne Sherýbaı-Nura ózenderinde sý basý qaýpi tónedi. Atalmysh sý qoımalarynyń jaǵdaıy turaqty baqylaýda.
«Apta saıyn oblystyq TJD men Qazgıdromettiń qyzmetkerleri ózen basseınindegi ylǵal qory boıynsha boljam jasaıdy. Olar qardaǵy ylǵal mólsheri men onyń jalpy sanyn ólsheıdi. Mamandardyń málimetterine sáıkes, bir aı buryn Nura basseınindegi ylǵal qaýpi mıllıard tekshe metrdi qurady, al qazir 130 mıllıonǵa azaıdy. Endi olardyń deńgeıi ótken jylǵy kórsetkishterge sáıkes keledi», - dep habarlady Qaraǵandy oblystyq TJD bastyǵy Ibragım Kúlshimbaev.
Sondaı-aq, Sherýbaı-Nura basseıninde ylǵal qorynyń shamaly tómendegen. Aýa raıyna baılanysty kórsetkishter jaqsarady: kúndiz oblystyń barlyq aýmaǵynda plıýs temperatýra saqtalýda, al túnde termometr baǵany nólden tómen túsedi.
Búgingi kúni oblysta ózen arnasynyń boıynda ornalasqan eldi mekenderdiń sý basýyn boldyrmaý úshin barlyq kúsh jumsalýda. 2018 jyly Nura aýdany Qantaı aýylynyń aınalasyna 2950 metr úımejal salyndy. Qazir Kantaıdyń aınalasynda erigen sýdyń aǵýy úshin aryq qazyldy.
Uzyndyǵy 1 700 m bolatyn úımejal Tassýat aýylyn sý tasqynynan qorǵaıdy. Birneshe jyl buryn ol sý astynda qalyp qoıǵan bolatyn. Al 2017 jazda eldi mekenniń aınalasynda úıindi bıiktetildi. Ótken jyly ol qıyrshyq taspen nyǵaıtyldy. Sonymen qatar, erigen sýdy qorǵanys biligindegi negizgi sý ótkizý qurbyryna araı aǵyzatyn aryqtar qazyldy.
Qaraǵandy oblysynda barlyǵy 13 qorǵanys jal men gabıon salyndy. Olardyń barlyǵy nyǵaıtylǵan.
Joldarda sý alyp ketpeýi úshin qutqarýshylar ózen arnalarynda jáne burylystarda jarylys jumystaryn júrgizedi. 20 ýchaskede muz-seń jarylady.
Jeńis Qasymbek oblystaǵy sý tasqyny jaǵdaıyna kúndelikti monıtorıng júrgizýdi jalǵastyrýdy tapsyrdy.
