Qaraǵandy oblysynda kóktemgi sý tasqynyna daıyndyq bastalyp ketti

QARAǴANDY. QazAqparat – Qaraǵandy oblysynda eldi mekenderden 461 myń tekshe metr qar shyǵaryldy. Bul jumys áli de jalǵasyp jatyr. Sonymen qatar, sý burý jáne nóser káriz júıesin ýaqtyly tazartý, gıdroqurylysty daıyndaý erekshe nazarda, dep habarlaıdy QazAqparat tilshisi.

Sý tasqyny kezeńine daıyndyq máseleleri apparattyq keńeste talqylandy.

Oblystyq TJD bastyǵy Murat Qatpanov materıaldyq-tehnıkalyq quraldar qory jaıynda baıandady. Onyń aıtýynsha, qazirgi ýaqytta 80 myń tonnaǵa jýyq ınertti materıal men 63 myń qap daıyn tur.

Búgin Nura jáne Sherýbaı-Nura ózenderiniń basseınderinde qar ólsheý boıynsha alǵashqy aralaý jumystary bastaldy.

«Óńirler mynaǵan erekshe nazar aýdarý qajet: birinshiden – aryqtardyń, naýalardyń jáne nóserli kárizderdiń jaı-kúıine, olardy aldyn ala tazartýdy uıymdastyra otyryp, onyń ishinde jeke aýmaqtar men sý ótkizgish aryqtardy, naýalardy qardan, qoqystan tazartý boıynsha halyqpen túsindirý jumystaryn júrgizý, ekinshiden – eldi mekender men obektilerdiń aınalasynda nemese boıynda qar transheıalaryn jasaý jumysyn uıymdastyrý», – dep atap ótti Murat Qatpanov.

Óńir basshysy Ermaǵanbet Bólekpaev qalalar men aýdandardyń ákimderine, sondaı-aq quzyrly mekemelerge tapsyrma berdi.

Olar sý burý jáne nóser káriz júıelerin ýaqtyly daıyndaýǵa, gıdroqurylystardyń jumysyn baqylaýǵa, avtojoldardaǵy ahýaldy baqylaýǵa qatysty.

Foto: Qaraǵandy ​​oblysy ákimdiginiń baspasóz qyzmeti