Qaraǵandy oblysynda kóktemgi sý tasqynyna daıyndyq bastaldy
QARAǴANDY. QazAqparat – Qaraǵandy oblysynyń eldi mekenderinen 1.5 mln tekshe metr qar shyǵaryldy. Bul qardyń kóp bóligi oblys ortalyǵyna tıesili. Osy jáne basqa da is-sharalar týraly Tótenshe jaǵdaılar departamentiniń basshysy Ibragım Kúlshimbaev apparattyq keńeste málim etti, dep habarlaıdy QazAqparat tilshisi.
Qaraǵandy oblysynda sý tasqynyna daıyndyq bıylǵy jyldyń qańtar aıynyń birinshi aptasynda bastaldy. Jaǵdaıdy qardyń erekshe qalyń túsýi qıyndatyp otyr. Osy jyly aq ulpa normadan tórt ese artyq jaýǵan.
«Sý tasqynynyń qalypty ótýi kóp jaǵdaıda ınfraqurylym men sý obektileriniń daıyndyǵyna baılanysty bolady. Oblys ákimdiginde aýdandardaǵy bólimshelermen jumys toby quryldy. Ol kún saıyn eldi mekenderdegi gıdroqurylystar men ahýaldyń jaǵdaıyna monıtorıng júrgizedi. Sý qoımalarynan sý aǵyzý rejimin jáne toltyrý normalaryn saqtaýdy uıymdastyrý qajet. Sý ótkizý qurylystarynyń jaı-kúıine erekshe nazar aýdarý kerek. Sondaı-aq qaýip tóngen jaǵdaıda aımaqtaǵy adamdardy qulaqtandyrý kerek», - dedi Qaraǵandy oblysynyń ákimi Jeńis Qasymbek.
Tótenshe jaǵdaılar departamentinde sý tasqyny kezeńinde qajet bolýy múmkin tehnıka sany naqtylandy. Olardyń ıeliginde ótimdiligi joǵary vahta avtobýsy, batpaqta júre alatyn kólik, qaıyq, motopompa jáne gıdrokostıým bar.
Ibragım Kúlshimbaevtyń aıtýynsha 25 aqpannan bastap oblysta sý ótkizý qubyrlary tazartylady. 1 naýryzdan bastap oblystyń iri ózenderinde muz jarý jumystary júrgiziledi. Jarylys jumystary 20 ýchaskede ótkizilýi tıis.
Qaýipti aımaqtarda ornalasqan aýyldardyń mańynda jer sý bógeıtin úıindi turǵyzylyp, gabıondardy nyǵaıtý jumystary bastaldy.
«Kazgıdromet» boljamy boıynsha sý tasqyny naýryzdyń úshinshi onkúndiginde bastalady dep kútilýde. Osy ýaqytta oblystyń barlyq aýmaǵynda aýa temperatýrasy nólden joǵary bolady. Sınoptıkterdiń aıtýynsha, naýryz aıynda aýa raıy jyly jáne jaýyn-shashynsyz bolady.
