Qaraǵandy oblysynda kóktemgi egis naýqany bastaldy

QARAǴANDY. QazAqparat - Qaraǵandy oblysynyń birneshe aýdanynda sharýalar dándi-daqyldardy egý jumystaryna kiristi.

Bul týraly búgin oblys ákimdiginde ótken apparat jınalysynda aýyl sharýashylyǵy basqarmasynyń basshysy Saǵynjan Apaqashov málim etti, dep habarlaıdy QazAqparat tilshisi.

Dándi-daqyldardy egýge Abaı, Buqar Jyraý, Jańaarqa jáne Shet aýdandarynyń sharýalary kiristi. Qazirgi tańda barlyǵy 21,9 myń gektar alqapqa egin egildi. Onyń ishinde 12,8 myń ga jerge bıdaı egilgen. Abaı aýdanynda 65 ga kartop, 25 ga basqa da kókónis ósirilýde.

Qalǵan aýdandarda topyraqty daıyndaý jumystary aıaqtalyp qaldy. 96 myń gektar jerde egis aldyndaǵy óńdeý, al 33 myń gektarǵa kóktemgi óńdeý jumystary júrgizildi.

Fermerler dızel otynymen qamtamasyz etiledi. Búgingi kúnge deıin aımaqqa 3 977 tonna jaǵarmaı jóneltildi.