Qaraǵandy oblysynda kokstan belsendirilgen kómir óndiriledi
ASTANA. QazAqparat - 2017 jyly Qaraǵandy oblysynda usaq arnaıy kokstan belsendirilgen kómir óndirý kózdelgen. Bul týraly oblys ákimdiginde kómir ónerkásibindegi jaǵdaı boıynsha ótken keńeste «Shubarkól kómir» AQ prezıdenti Kemal Ýsmanov málimdedi, dep habarlaıdy oblys ákiminiń baspasóz qyzmeti.
«Usaq arnaıy kokstan belsendirilgen kómir óndirýdi uıymdastyrý» jobasy Energetıka mınıstrliginiń Jol kartasyna engizildi. Ony júzege asyrýǵa 40 mln teńgege jýyq qarjy salyndy. 2017 jyldyń tamyzyna qaraı osy ónimniń óndirisi úshin tájirıbelik-ónerkásiptik qurylǵyny iske qosýdy josparlap otyrmyz. Onyń qýattylyǵy - jylyna 1000 tonnaǵa deıin bolady», - dep atap ótti Kemal Ýsmanov.
Bul kómirdi tereń óńdeý tehnologııasyna qatysty.
«Ótkizý naryqtary bar. Qazaqstanda belsendirilgen kómir tutyný jylyna shamamen 3 myń tonnany quraıdy. Ónim negizinen altyn óndirisinde qoldanylady. Perspektıva bar», - deıdi Kemal Ýsmanov.
Joba ımportty almastyrýǵa baǵyttalǵan. Qazirgi kezde belsendirilgen kómir Reseı, Ýkraına jáne Qytaıdan ákelinedi.
