Qaraǵandy oblysynda «Kókmaısa» etnofestıvali ótedi
QARAǴANDY. QazAqparat - Maýsymnyń 14 men 16 aralyǵynda Qaraǵandy oblysynyń Ulytaý aýylynda ekinshi márte «Kókmaısa» etnofestıvali ótedi. Sharaǵa Qazaqstannyń barlyq óńirinen, alys jáne jaqyn shet elderden qonaqtar keledi, dep habarlaıdy QazAqparat tilshisi.
Festıvaldiń birinshi kúninde Ulytaý aýylynyń mádenıet úıinde «Edige taý - eski jurt eskertkishi» atty ǵylymı-tájirıbelik konferentsııasy ótedi. Konferentsııadan soń qonaqtar úshin Edige taýyna sapar uıymdastyrylady. Túski astan soń dástúrli ánder baıqaýynyń irikteý kezeńi ótedi. Keshki ýaqytta jastar úshin «Altybaqan ánderi» merekesi bolady. Munda jastar altybaqanda terbelip, qazaq halyq ánderin oryndaıdy.
15 maýsymda «Kókmaısa» etnofestıvali teatrlandyrylǵan kórinispen ashylady. Dál osy kúni qoldanbaly óner boıynsha sheberlik synyptar, sadaq atý, qatyn kúres, aýdaryspaq, teńge alý, asaý úıretý sekildi ulttyq saıystar uıymdastyrylady. Keshke sahnada án oryndaýshylar baıqaýynyń aqtyq saıysyna shyqqandar óner kórsetedi. Sońynda jınalǵan qaýym nazaryna gala kontsert usynylady jáne bı keshi bolady dep josparlanýda.
Festıvaldiń sońǵy kúninde qonaqtar men qatysýshylar úshin Ulytaý taýlaryna ekskýrsııa uıymdastyrylady. Taý bókterinde atpen serýendeýge bolady. Bul kúni sondaı-aq kókpar, qyz qýý, alaman báıge ótedi. Sońynda festıvaldiń jabylý saltanaty bolady.
«Kókmaısa» etnofestıvalin uıymdastyrýdyń basty maqsaty - Ulytaý aýdanynyń týrıstik áleýetin joǵarylatý bolyp tabylady. Bul shet eldik qonaqtardy qazaq halqynyń tarıhymen jáne mádenıetimen tanystyrýdyń jaqsy jáne kórnekti múmkindigi.
«Kókmaısa» etnofestıvali alǵash ret 2018 jyly Jezqazǵannan 160 shaqyrym qashyqtyqta Ulytaý mańyndaǵy Kenenbaı kóliniń janynda ótti. Ol «Terisaqqan kóktemi» etnofestıvaliniń bir bóligi bolyp tabylady. Atalmysh shara shet el azamattary tanymaldylyqqa ıe bolyp, ıÝNESKO jáne ISESKO (Bilim, ǵylym jáne mádenıet máseleleri boıynsha Islam uıymy) bedeldi halyqaralyq uıymdarynyń nazaryn aýdarǵan.
