Qaraǵandy oblysynda qoǵamdyq kólikte qoldanylatyn jańa jeńildikter engizildi

QARAǴANDY. QazAqparat – Qaraǵandy oblysynda 1 naýryzdan bastap kóp balaly analar, І toptaǵy múgedekter jáne 15 jastan 18 jasqa deıingi jasóspirimder qoǵamdyq kólikte jol júrýge qosymsha jeńildikter aldy, dep habarlaıdy QazAqparat tilshisi.

Jańa jeńildikter «Baqytty bala - Baqytty ana - Baqytty otbasy - Baqytty el» jol kartasy aıasynda engizildi.

Sonymen, kelesi sanattar qala mańyndaǵy marshrýttarda tegin júrý quqyna ıe:

- «Altyn alqa», «Kúmis alqa» alqalarymen marapattalǵan nemese buryn «Batyr ana» ataǵyn alǵan, sondaı-aq I jáne II dárejeli «Ana dańqy» ordenderimen marapattalǵan kóp balaly analar;

- birinshi toptaǵy múgedekter.

Olarǵa avtobýstarda tegin júrý úshin buryn alǵan «Áleýmettik» kólik kartalaryn paıdalanýǵa bolady.

Qala mańyndaǵy marshrýttarda tegin júrý úshin baqylaýshylarǵa anyqtamalar men jeńildikter týraly kýálikterdi (túpnusqa) kórsetý qajet.

Jaqyn arada arnaıy kartalar tegin resimdeledi.

15 pen 18 jas aralyǵyndaǵy jasóspirimderge keletin bolsaq, 1 naýryzdan bastap olarǵa jol júrý qunynyń 50%-y mólsherinde jeńildik berildi. Buǵan deıin bul sanattaǵylar jol aqysyna 80 teńgeden tólegen bolatyn.

«7-15 jastaǵy balalar» kartasy bar adamdar úshin jeńildik avtomatty túrde uzartylady. Ol úshin eshqaıda barýdyń qajeti joq. Karta 18 jasqa deıin jaramdy bolady.

15 jasqa tolǵan jáne «Balalar» kartasy buǵattalǵan, biraq qolynda bar bolsa, bul jolaýshylar 1 naýryzdan keıin ony iske qosýǵa ótinish berýi kerek. Bul qyzmet tegin.