Qaraǵandy oblysynda kıim-keshekti tegin beretin dúken ashyldy
ASTANA. QazAqparat - Qaraǵandy oblysynyń Saran qalasynda alǵashqy áleýmettik qaıyrymdylyq dúken ashyldy. Onda zattardy tómen baǵamen nemese tegin alýǵa bolady, dep habarlaıdy QazAqparat óńir basshylyǵynyń baspasóz qyzmetine silteme jasap.
«BlagoDarıý» dúkeninde ázirge kishigirim eki bólim ǵana bar. Birinshisinde - qoldanysta bolǵan, biraq jaǵdaıy jaqsy kıimder. Olar muqtaj jandarǵa tegin taratylady. Al ekinshi bólimde - dúkennen tómen baǵamen satyp alynǵan jańa zattar. Olardy saýda núkteleriniń ıeleri, taýar satylmaı qalǵan jaǵdaıda alyp kelip ótkizedi. Bul zattardy kez kelgen adam arzanǵa satyp alýlaryna bolady. Barlyq túsken qarajat qaıyrymdylyqqa jumsalady.
Mundaı dúkendi qurý ıdeıasy «Dobrovolets» jastar qoǵamdyq birlestiginiń jetekshisi Anna Polkovnıkovada burynnan týyndaǵan eken. Alaıda bul isti bastaý úshin qajetti ǵımarat ta, ony jalǵa alýǵa qarajat ta bolmaǵan.
«Qazirgi tańda Saran qalasynyń jastar resýrs ortalyǵy men jergilikti kásipkerler palatasynyń fılıalynyń kómeginiń arqasynda dúkendi ashý múmkindigi paıda boldy. Olar qala ákimshiligimen kelisip, bizge tegin túrde eki kishigirim bólme bóldi. Bizge bul ázirge jetkilikti», - deıdi Anna.
«Dobrovolets» birlestiginiń qaraýynda 214 otbasy bar. Olardyń keıbiri dúken ashylǵan alǵashqy kúnderi qajetti kıim-keshekterin alyp úlgergen.
«Búgin dúken úshinshi kún istep jatyr. Keshe bizge tórt januıa keldi de, barlyq otbasy múshelerine qajetti kıim-keshekterin tegin alyp ketti. Árıne, ázirge kelýshilerdiń barlyǵy tegin bólimge baryp jatyr. Alaıda, biz ózimiz de soǵan basymdylyq tanytyp otyrmyz, osylaı bolaryn kútkenbiz», - deıdi Anna Polkovnıkova.
