Qaraǵandy oblysynda kenshilermen kezdesý ótip, birqatar másele talqylandy

QARAǴANDY. QazAqparat – Qaraǵandy oblysynyń ákimi Jeńis Qasymbektiń tóraǵalyǵymen kelisý komıssııasynyń shahterlermen kezekti otyrysy ótti. «ArselorMıttal Temirtaý» AQ Kómir departamentiniń eńbek ujymdary kenshiler atynan suraqtaryn ortaǵa saldy, dep habarlaıdy QazAqparat tilshisi.

Basqosýda talqylanǵan eń basty másele – kenshiler úshin zeınettik jasty tómendetý boldy. Bul máselege túsinik berý úshin QR Eńbek jáne áleýmettik qorǵaý birinshi vıtse-mınıstri Aqmádı Sarbasov shaqyryldy.

A. Sarbasov zeınetke shyǵý jasyn tómendetýge qatysty vedomstvoaralyq komıssııa jumysy jalǵasyp jatqanyn aıtty.

«Biz halyqaralyq tájirıbeni zerttedik. Birneshe nusqalar qarastyrylýda. Onyń ishinde arnaıy qosymsha aqylardy engizýdi talqylap jatyrmyz. Memleketpen qatar jumys berýshi de mindetteme alýy tıis», - deıdi Eńbek jáne áleýmettik qorǵaý birinshi vıtse-mınıstri.

Vedomstvo esepteýler men naqty shemalardy keıinirek usynýǵa ýáde berdi.

Oblys ákimi Jeńis Qasymbektiń aıtýynsha, sheshimin qajet etetin másele áli jeterlik.

«Kelisý komıssııasy jyl boıy jumys isteıdi. Progress bar. Biraq áli sheshimin tappaǵan birqatar júıelik máseleler jetkilikti. Ótken otyrysta normatıvtik san, kadrlardyń aýysýy, jabdyqtardy jańartý máselelerin talqyladyq. Árıne, eńbek qaýipsizdigi men eńbekti qorǵaýdy qamtamasyz etý sharalary birinshi orynǵa shyǵady», – dep atap ótti ol.

Kenshiler kótergen jańa máseleler týraly «Qorǵaý» kómir óndirýshiler kásipodaǵynyń tóraǵasy Evgenıı Býslaev habarlady. Ol alty máseleni ortaǵa saldy, onyń ishinde jalaqyny kóterý, 13-shi jalaqy dep atalatyn eńbekaqy tóleý, eńbek qaýipsizdigin arttyrý jónindegi sharalardy tolyq qamtamasyz etý, kásiptik syrqattanýshylyqtyń aldyn alý jáne qyzmetkerlerdi saýyqtyrý júıesin jaqsartý.

Basqa da barlyq máseleler talqylaýǵa qabyldandy jáne olar boıynsha sheshimder kelesi kezdesýlerde aıtylatyn bolady.