Qaraǵandy oblysynda QAJD ókilderi paıdalanǵan qaǵazdy tapsyryp, ornyna kóshet satyp almaq
QARAǴANDY. QazAqparat – Qaraǵandy oblysy boıynsha qylmystyq-atqarý júıesi (QAJ) departamenti qaǵazdy óńdeýge tapsyryp, odan túsken qarajatqa aǵash kóshetterin satyp alýdy kózdep otyr, dep habarlaıdy QazAqparat tilshisi.
Kún saıyn departament qyzmetkerleri mol kólemde keńse qaǵazdaryn paıdalanady, paıdalanylǵan qaǵaz keıin qoqysqa tastalady. Osy rette QAJ departamenti bastyǵynyń mindetin atqarýshy Bekbolat Shákirov paıdalanylǵan qaǵazdy qaıta óńdeý pýnktterine tapsyrý týraly bastama kóterip otyr. Odan túsken qarajatqa aǵash kóshetterin satyp alý josparlanýda.
«Ózderińiz biletindeı, álemdegi ekologııalyq ahýal máz emes. Adamnyń kúndelikti tynys-tirshiligimen qorshaǵan ortany lastaıtyn qoqysaýqymy da ósip keledi. Búgingi tańda oblysta PET-bótelkelerdi, polıetılen paketterdi, qaǵazdy, kartondy qabyldaıtyn jáne bul úshin aqsha tóleıtin birneshe pýnkt jumys isteıdi. Jalǵyz shart – barlyq qaıta óńdeý jáne PET bótelkeler taza bolýy kerek. Biz oblys turǵyndaryna ónege bola otyryp, olardy tabıǵatty qorǵaýǵa shaqyramyz!» – deıdi Bekbolat Shákirov.
