Qaraǵandy oblysynda Qazaqstan halqynyń birligi kúni ıgi istermen atap ótilýde
«Táýelsizdiktiń 30 jyldyq mereıtoıy aıasynda Qazaqstan halqynyń birligi kúni erekshe mánge ıe bolady. Osy jyldar ishinde biz qoǵamymyzdaǵy birlikti, beıbitshilik pen kelisimdi saqtaı aldyq dep nyq senimmen aıta alamyz. Elbasy atap ótkendeı, bul eń aldymen bir-birine, jaqyn jerde, bir jerde ómir súrýdi úırengen adamdardyń eńbegi. Qıyn jáne qýanyshty kezeńderde biz árqashan birge boldyq. Biz birge pandemııanyń qıyn kezeńin bastan ótkerýdemiz. Árbir etnomádenı birlestiktiń, sizderdiń árqaısyńyzdyń qosqan úlesterińiz baǵa jetpes. Bir shańyraq astynda birikken bizdiń ortaq ómirimiz osy», – dep quttyqtady aımaq basshysy Jeńis Qasymbek.
Oblys ákimi jas urpaqty toleranttylyqqa, ózara kómek pen birlik sezimine tárbıeleý úshin jastarmen jumysty kúsheıtýge shaqyrdy.
Merekege oraı etnomádenı birlestikter ekologııalyq jáne qaıyrymdylyq aktsııalaryn uıymdastyrdy. Mysaly, Jezqazǵanda úlken qazanda palaý daıyndap, kópbalaly jáne az qamtylǵan otbasylarǵa dastarhan jaıyldy. Osakarov aýdanynda Pıoner balalar úıiniń tárbıelenýshileri syılyq aldy.
Balqashta «Vozrojdenıe» nemis ortalyǵynyń músheleri eriktilermen birge kóldiń jaǵalaýyn retke keltirdi.
«1 mamyr — Qazaqstan halqynyń birligi kúni – erekshe mereke. Bizdiń elimiz – túrli etnostar men ulttar beıbit ómir súretin kópultty úı. Mundaı kúni bizdiń ásem jerimizge qamqorlyq jasaý mańyzdy. Biz Balqash Qazaqstannyń top-10 týrıstik aımaǵynyń qataryna kiretinin maqtan tutamyz», – dep atap ótti etnobirlestiktiń belsendisi Olga Potanına.
Qaraǵandyda ekologııalyq aktsııa «Qaraǵandy oblysynyń koreıleri atynan qazaq halqyna alǵys» estelik belgisiniń janynda ótti.
