Qaraǵandy oblysynda qatigezdikpen kisi óltirdi degen kúdikpen 20 jastaǵy jigit ustaldy
QARAǴANDY. QazAqparat - Qaraǵandy oblysynda kisi óltirdi degen kúdikpen 20 jastaǵy aýyldyq jigit ustaldy, ol áıeldiń denesin bólshektep tastaǵan, dep habarlady óńirdiń ІІD baspasóz qyzmetinen.
«Krımınaldyq polıtsııa qyzmetkerleriniń jedel sharalarynyń nátıjesinde asa aýyr qylmys jasady degen kúdikpen Osakarov aýdanynyń 20 jastaǵy turǵyny ustaldy», - delingen habarlamada.
Polıtsııanyń aqparatyna súıensek, Qaraǵandyda 9 mamyrda jylý joldarynyń birinde 6 mamyrdan bastap habar-osharsyz ketkeni úshin izdestirilip jatqan 26 jastaǵy qala turǵynynyń bólshektelgen denesi tabyldy.
Ustalǵan er adam qylmysyn moıyndady. «Onyń aıtýynsha, áıeldi óltirýine aralarynda bolǵan janjal sebep bolǵan. Sosyn qylmysyn jasyrý maqsatynda deneni bólshektep, tyǵyp tastaǵan», - delingen habarlamada.
Qazir kúdikti ýaqytsha ustaý ızolıatoryna qamaldy. Oǵan qatysty QR QK 99-baby boıynsha qylmystyq is qozǵaldy. Sot aldy tergeý júrgizilýde.
