Qaraǵandy oblysynda kásipkerlikpen áriptestik aıasynda 14 joba qolǵa alyndy
QARAǴANDY. QazAqparat - Qaraǵandy oblysynda memlekettik-jekemenshik áriptestik boıynsha júzege asyrylatyn jobalar tizimi quryldy. Bul baǵytta qandaı jumystar atqarylyp jatqany týraly ekonomıka jáne bıýdjettik josparlaý basqarmasynyń basshysy Oraz Táýirbekov apparattyq jıyn barysynda baıandap berdi, dep habarlaıdy QazAqparat Qaraǵandy oblysy ákimdiginiń baspasóz qyzmetine silteme jasap.
Baspasóz málimetterine qaraǵanda, 2017 jyly salalyq basqarmalar jalpy somasy 7,4 mlrd teńgeni quraıtyn memlekettik-jekemenshik áriptestigi aıasynda 21 kelisimshartqa qol qoıdy. Oǵan qosa, taǵy 9 jobany júzege asyrý bastaldy. Olardyń segizi boıynsha osy jyldyń naýryzynda kelisimsharttarǵa qol qoıyldy. Kelisimderdiń jalpy somasy - 1,3 mlrd teńge. Bul jobalardyń altaýy densaýlyq saqtaý salasyna, bir-bireýden bilim men sport salalaryna qatysty.
«Salalyq memlekettik organdardyń, qalalar men aýdandardyń ákimdikteriniń usynysy boıynsha júzege asyrylýǵa usynylǵan jobalar tizimi quryldy. Olardyń sany - 111. Onyń ishinde 55-i 2018-shi jylǵa barlyq deńgeıdegi bıýdjettermen qarastyrylǵan aǵymdaǵy shyǵyn sheńberinde júzege asyrylýy múmkin. 19 joba boıynsha qosymsha qarajat qajet. 37 joba júzege asyrý barysynda áriptesterdiń ınvestıtsııalyq jáne operatsııalyq shyǵyndaryn óteýdi qarastyrady», - dedi Oraz Táýirbekov.
«Jeke qarjylyq bastama retinde aqpanda jalpy somasy 3,3 mlrd teńgeni quraǵan 14 joba júzege asyryla bastady. 12 jobanyń bıznes josparlary saraptamadan ótýde, ekeýi boıynsha áleýetti áriptesterden usynystar qabyldaý bastaldy. Memlekettik organdarmen alǵa tartylǵan MJÁ jobalary Aımaqtyq kásipkerler palatasymen birlesip uıymdastyrylǵan forým barysynda tanystyryldy. Saraptamada oń qorytyndy alatyn jobalardy oblystyq máslıhat depýtattary qarastyratyn bolady»,-delingen habarlamada.
