Qaraǵandy oblysynda kásipkerler ishki memlekettik aýdıt qyzmetin paıdalanady
ASTANA. QazAqparat - Qaraǵandy oblysynyń Іshki memlekettik aýdıt departamenti Kásipkerler palatasymen birigip jumys isteıtin bolady, dep habarlaıdy Qaraǵandy oblysy ákimdiginiń baspasóz qyzmeti.
Baspasóz málimtetterine qaraǵanda, kásipkerler palatasy men Qaraǵandy oblysy boıynsha Іshki memlekettik aýdıt departamenti ózara seriktestik týraly memorandýmǵa qol qoıdy. Eki jaq bıýdjettiń oryndalýy jáne josparlanýy, memlekettik satyp alý jáne qarjylyq esep salasynda ózara qarym-qatynas týraly kelisim jasady.
«Bızneste árdaıym memlekettik satyp alý, júıe quraýshy kompanııalardyń, kvazısektordyń satyp alýy salasynda problemalar bolǵan. Kásipkerler jıi qatelikterge oryn beredi, memlekettik satyp alý salasynda bolyp jatqan jańalyqtar men ózgeristerdi qadaǵalamaıdy. Endi palata memlekettik aýdıt sarapshylaryn jumyldyra alady, olar óz kezeginde belgili bir qatelikterdi jiberip almaý týraly keńes beredi», - dedi Aımaqtyq palata dırektory Ernar Kúlpeıisov memorandýmǵa qol qoıý rásiminde.
Ózara seriktestik ekonomıkalyq jáne qarjylyq qylmys pen zańbuzýshylyqtardyń aldyn alýǵa, anyqtaýǵa jáne joıýǵa septigin tıgizedi, bıýdjetti durys josparlaýǵa jáne oryndaýǵa kómektesedi.
Qaraǵandy oblysy boıynsha ishki memlekettik aýdıt departamentine bıylǵy jyldyń ózinde 1000-nan astam úndeý tastalǵan, onyń 70 paıyzy qaralyp úlgerdi.
Іshki memlekettik aýdıt departamentiniń jetekshisi Almas Kaýkıtaevtyń aıtýynsha, ózara seriktestik Qaraǵandy oblysynda kásipkerlik bastamalardy júzege asyrý úshin oń zańnamalyq, ekonomıkalyq jáne áleýmettik jaǵdaı jasaýǵa septigin tıgizedi.
Kezdesý barysynda eki jaq kásipkerlerdiń quqyqtary men mindetterine qatysty túıitkildi máselelerdi ózara kelise otyryp sheshý mámilesin jasady.
