Qaraǵandy oblysynda qarttar úıiniń turǵyndarynan koronavırýs anyqtaldy
QARAǴANDY. QazAqparat – Qaraǵandy oblysynyń Shahan kentinde koronavırýs ınfektsııasyn juqtyrý oqıǵasy tirkeldi.
Osyǵan baılanysty Shahtınsk qalasynyń bas sanıtarlyq dárigeri atalǵan eldi mekende shekteý sharalaryn qatańdatý týraly sheshim qabyldady, dep habarlaıdy QazAqparat tilshisi.
Oblystyq sanıtarlyq-epıdemıologııalyq baqylaý departamentinde vırýs juqtyrǵandardyń naqty sany áli anyqtalǵan joq. Sebebi PTR-test nátıjeleri áli daıyn emes. Vedomstvo ınfektsııa oshaǵy oqshaýlanǵanyn jáne dárigerler baılanysta bolǵan adamdardy anyqtaǵanyn habarlady.
«Mekemede dezınfektsııalyq óńdeý júrgizildi. Barlyq naýqastarǵa qajetti em kórsetiledi. Aýyr haldegi naýqastar joq», - dep atap ótti Qaraǵandy oblysynyń sanıtarlyq-epıdemıologııalyq baqylaý departamentinde.
Shahan kentinde koronavırýs ınfektsııasymen syrqattanýshylyqtyń oblystyq kórsetkishinen asyp ketýine baılanysty Shahtınsk qalasynyń bas memlekettik sanıtarııalyq dárigeri birqatar shekteý sharasyn engizý týraly sheshim qabyldady.
Osylaısha, mynadaı qyzmetterge tyıym salynady:
- mektepke deıingi balalar mekemeleri;
- balalar kabınetteriniń/túzetý ortalyqtarynyń, balalar men eresekterdiń bilim berý ortalyqtarynyń qyzmeti;
- sporttyq-saýyqtyrý ortalyqtarynyń, trenajer zaldarynyń, sport úıirmeleriniń/sektsııalarynyń jumysy;
- jármeńkeler;
- mádenıet obektileriniń.
Jalpy bilim beretin mektepter qashyqtyqtan oqytý formatyna kóshýde.
Qazaqstan Respýblıkasynyń eńbek zańnamasyna sáıkes demalys kúnderi mynadaı shekteý sharalary engiziledi:
- senbi jáne jeksenbi kúnderi monshalardyń, saýnalardyń jumysyn toqtata turý;
- senbi jáne jeksenbi kúnderi bazarlardyń jumysyn toqtata turý.
Qoǵamdyq tamaqtaný obektileriniń qyzmetin saǵat 09-00-den 20-00-ge deıin shekteý (50% - ǵa deıin toltyrylǵan jaǵdaıda, zalda 30-dan aspaıtyn oryn ornata otyryp, áleýmettik qashyqtyqty, maska rejımin, termometrııany, kúsheıtilgen sanıtarııalyq-dezınfektsııalyq rejımdi saqtaı otyryp, buqaralyq is-sharalar ótkizbeı).
Qyzmet kórsetý salasyndaǵy sýbektilerdiń (Ekinshi deńgeıdegi bankter, poshta bólimsheleri, Halyqqa qyzmet kórsetý ortalyqtary, advokattyq jáne notarıattyq keńseler, lombardtar, mıkroqarjy jáne mıkrokredıttik uıymdar, saqtandyrý kompanııalary) qyzmetin (aldyn ala jazylý boıynsha) saǵat 09-00-den 16-00-ge deıin shekteý.
Demalys kúnderi (senbi jáne jeksenbi) Shahtınsk-Shahan-Shahtınsk qatynasyndaǵy qala mańyndaǵy turaqty jolaýshylar tasymaldarynyń qozǵalysy toqtaıdy.
Turǵyndarǵa qyzmetine ruqsat etilmegen obektilerge barýǵa tyıym salynady, sondaı-aq olardyń jumys rejımine sáıkes jabylǵannan keıin obektilerde bolýǵa tyıym salynady.
Qaýly 2021 jylǵy 6 aqpanda saǵat 00-00-den bastap kúshine enedi.
