Qaraǵandy oblysynda karantın rejımin saqtamaǵan kásiporyndar sotqa tartylýy múmkin
QARAǴANDY. QazAqparat - Qaraǵandy oblysyndaǵy kásiporyndarda sanıtarlyq-epıdemıologııalyq talaptardyń saqtalýyna baqylaýdy kúsheıtý josparlanýda. Bul týraly tikeleı efırde ótken brıfıngte Qaraǵandy oblysynyń bas memlekettik sanıtarlyq dárigeri Qanat Asqarov málim etti, dep habarlaıdy QazAqparat tilshisi.
Óńirimizde koronavırýstyq ınfektsııamen syrqattanýshylyq deńgeıin tómendetý úshin oblys ákimi Jeńis Qasymbektiń basshylyǵymen ótken óńirlik shtabtyń otyrysynda oblys aýmaǵynda mobıldi brıgadalardy uıymdastyrý týraly sheshim qabyldandy. Oǵan jergilikti atqarýshy jáne quqyq qorǵaý organdarynyń qyzmetkerleri, sondaı-aq «Atameken» kásipkerler palatasynyń músheleri kiredi. Brıgada sanıtarlyq sharalardyń saqtalýyn baqylaýǵa jáne bıznesmendermen túsindirý jumystaryn júrgizýge kómektesetin bolady. Qoıylatyn talaptardy saqtamaǵany úshin QR Ákimshilik Kodeksiniń 462 baby, 3 bólimi boıynsha kásipkerler sotqa berilýi múmkin.
Qaraǵandy oblysynda sońǵy aptada COVID-19 aýrýshańdyǵynyń ósimi 43,3%-dy qurady. Aımaqta karantındik sharalardy jeńildetkenge deıin ol 7%-dan aspady. Osyndaı kúrt serpilistiń sebebin Qanat Asqarov keıbir kásipkerlerdiń sanıtarlyq-epıdemıologııalyq talaptarǵa nemquraıly qaraýymen túsindirdi.
«Bas sanıtarlyq dárigerdiń qaýlysymen qyzmetti qaıta bastaýǵa ruqsat etilgen kásiporyndar barlyq talaptardy qatań saqtaýy qajet. Oryndalmaǵan jaǵdaıda problemalar paıda bolady, aýrýshańdyq ósýde, ol bizdiń oblystyń shartty túrde «taza« aýmaǵyna taralady. Eger oblystyń árbir turǵyny qarapaıym sanıtarlyq talaptardy saqtasa, biz juqtyrý qaýpin tómendetemiz», - dedi ol.
Mysal retinde oblystyń bas sanıtarlyq dárigeri «Qazaqmys» AQ tıesili «Nurqazǵan» kenishin keltirdi. Kásiporynda koronavırýstyq ınfektsııanyń 133 jaǵdaıy tirkelgen. Kenishtiń jumys isteıtinderdiń 41%-y Temirtaý qalasynda turady - bul 54 adam. Qaraǵandyda 48% nemese 65 adam turady, Buqar jyraý aýdanynda - 11% nemese 14 adam. Naýqastarmen qarym-qatynasta bolǵan 1 515 adam anyqtaldy, onyń ishinde 244 jaqyn baılanysta, 1 271 áleýetti baılanysta bolǵan.
Qazir kenishtiń jumysy toqtatyldy. Ol 1 maýsymǵa deıin jabylady. Baılanysta bolǵandardyń barlyǵynan PTR taldaýlar alyndy. Nátıjeler keıinirek belgili bolady.
Keıbir qaraǵandylyqtar qoǵamdyq kólikte sanıtarlyq talaptardyń saqtalmaýyna narazy. Taýarlar men qyzmetterdiń sapasy men qaýipsizdigin baqylaý departamentinde eger avtoparkter aldaǵy ýaqytta sanıtarlyq dárigerdiń talaptaryna nemquraıly qaraıtyn bolsa, keıbir reıster toqtatylýy múmkin ekenin habarlady.
«Qoǵamdyq kólik qozǵalysyn qalpyna keltirmes buryn biz avtoparkter basshylarymen kezdestik. Olarǵa barlyq algorıtmderdi jáne sanıtarlyq-epıdemıologııalyq talaptardy túsindirdik. Ókinishke oraı, talaptar oryndalǵan joq, adamdar maskalarsyz júredi, reısterden soń salondar óńdelmeıdi, jolaýshylar arasyndaǵy qashyqtyq saqtalmaýda. Qazir avtoparkter avtobýstardyń salondaryn qaıta óńdeýge kiriskenin kórip otyrmyz. Barlyq dezquraldar men antıseptıkter bar, maskalyq rejımdi saqtaıdy, marshrýttardyń tolymdylyǵy da qadaǵalanýda. Biraq adamdar avtobýsqa kirgende, óz densaýlyǵy týraly birinshi kezekte ózi oılaýy kerektigin túsinýi tıis», - dep túsindirdi Qanat Asqarov.
Qaraǵandy oblysynda balabaqshalar, erte damý ortalyqtary, kafeler men meıramhanalar mamyr aıynyń sońyna deıin jabyq bolady. Bıyl balalardyń jazǵy saýyqtyrý lagerleri jumys istemeıdi.
Balqash, Qarqaraly jáne Topar demalys aımaǵynyń jumysy qashan qaıta jandandyrylatyny maýsym aıynyń basynda belgili bolady.
