Qaraǵandy oblysynda karantın rejımin buzǵandarǵa salynǵan aıyppul 4 mln teńgeden asty
QARAǴANDY. QazAqparat – Qaraǵandy oblysynda karantın rejımi qalaı jáne qaı jerde buzylǵanyn óńirdiń jedel áreket etý ortalyǵynyń basshysy Qaırat Shormanbaev tikeleı efırde ótken brıfıng barysynda aıtyp berdi, dep habarlaıdy QazAqparat tilshisi.
Sondaı-aq ol qashyqtyqty saqtamaý, maska kımeý jáne mekemelerdiń ruqsat etilgen ýaqyttan tys jumys isteýi sııaqty jıi kezdesetin zańbuzýshylyqtardy atady.
Onyń aıtýynsha, oblysta 214 monıtorıngtik top jumys isteıdi, olar nysandardaǵy karantın talaptarynyń tek bes túriniń saqtalýyn tekseredi. Bul qyzmet kórsetý nysandarynyń ruqsat etilgen ýaqyttan tys jumys isteýi, otbasylyq merekeler – banketter, úılený toılary, mereıtoılar, eske alý jáne adamdar kóp jınalatyn basqa da sharalardy uıymdastyrý, ara qashyqtyqty saqtamaý, betperde taqpaý, qyzmet kórsetý nysandaryna kelýshiler sanynyń shekten tys kóp bolýy.
«Jyl basynan beri 10 978 nysan tekserilip, 429 zańbuzýshylyq anyqtaldy, al aıyppul somasy 4 mıllıon teńgeden asty. Ótken aptada Qaraǵandy oblysynda karantın rejımin buzǵan 6 nysan anyqtaldy. Tekserý kezinde onda 247 adam boldy jáne olardyń barlyǵy ákimshilik jaýapqa tartylady», - dedi Qaırat Shormanbaev.
Karantınde tyıym salynǵan qyzmet túrleri bar nysandarda, sondaı-aq 22.00-den keıin qoǵamdyq tamaqtaný oryndaryna baratyn óńir turǵyndaryna 30 AEK kóleminde aıyppul salynady. Mundaı oryndardyń tizimine banket zaldary, bılıard, karaoke, boýlıng ortalyqtary, batýttar, kompıýter, oıyn jáne túngi klýbtar, býkmekerlik keńseler kiredi.
«Mundaı nysandarǵa barý – ınfektsııanyń taralýy qaýpin artyrady. Eger kámeletke tolmaǵandar osyndaı oryndarda júrse, aıyppul ata-analaryna salynady», - dep eske saldy spıker.
Ol karantın talaptarynyń buzylýy týraly «Senim 109» biryńǵaı úılestirý ortalyǵyna habarlaýǵa bolatynyn, onda kelip túsken aqparattardyń tekserilip, ol rastalǵan kezde tıisti sharalar qabyldanatynyn aıtty.
