Qaraǵandy oblysynda karantın kúsheıdi
Bul týraly Saryarqa telearnasyndaǵy tikeleı efırde ótken brıfıngte taýarlar men qyzmetterdiń sapasy men qaýipsizdigin baqylaý departamentiniń basshysy Qanat Asqarov málim etti.
«Aýrýdyń ósýine karantın jaǵdaıynda qoıylatyn talaptardyń buzylýy yqpal etti: maskalyq rejımdi, áleýmettik qashyqtyqty saqtamaý. Qaýipsizdik erejelerin adamdardyń ózderi de, kásiporyn ákimshiligi de elemeıdi. Mobıldik toptar óz qyzmetin qaıta bastaǵan 153 nysanda bas memlekettik sanıtarlyq dárigerdiń qaýlysynyń talaptary buzylǵanyn anyqtady. Negizinen bul qoǵamdyq tamaqtaný, saýda, qoǵamdyq kólik nysandary», - dep atap ótti spıker.
Osynyń barlyǵy juqtyrý qaýpin joǵarylatady jáne karantın rejımin qatańdatýǵa májbúr etedi, dep atap ótti oblystyń bas sanıtarlyq dárigeri.
Ol KVI taralýynyń aldyn alý boıynsha qosymsha sharalar engizý týraly aıtty.
Halyqqa qyzmet kórsetý ortalyqtary qysqartylǵan jumys kestesine kóshedi - 09.00-den 14.00-ge deıin. Memlekettik qyzmetterdiń basym bóligi onlaın rejıminde usynylatyn bolady.
Qala ishindegi qoǵamdyq kóliktiń júrý ýaqyty - saǵat 06.00-den 21.00-ge deıin shekteledi. Jolaýshylardy salonǵa tek aldyńǵy esik arqyly kirgizedi, al shyǵý barlyq esikterdi bir sátte ashqan kezde júzege asyrylady. Osy talaptyń saqtalýyn baqylaý qatań bolýy tıis.
Jolaýshylardy taksımen tek bir adamnan nemese kámeletke tolmaǵan eki balany ertip júrgen bir eresek adamdy tasymaldaýǵa jol beriledi.
«Qazirgi ýaqytta tamaqtaný obektileriniń qyzmetine qatysty qosymsha sharalar engizý máselesi ózekti bolyp tur, óıtkeni koronavırýstyq ınfektsııa jaǵdaılaryn taldaý barysynda otbasylyq juqtyrý oqıǵalaryn tirkeý faktileriniń jıilegenin kýálandyrady. Kóptegen jaǵdaılarda aýrý juqtyrǵandar ózderiniń juqtyrýyn úı jaǵdaıynda da, meıramhanalarda da, dámhanalarda da ótkiziletin túrli jappaı saltanatty, otbasylyq, eske alý is-sharalarǵa qatysýymen baılanystyrady. Aýrý odan ári órshigen jaǵdaıda qoǵamdyq tamaqtandyrý nysandarynyń jumysyn tek jetkizý rejımine aýystyrý máselesi qaralady», - dedi Qanat Asqarov.
Sonymen qatar buryn engizilgen shekteý sharalary bar:
- 65 jastan asqan adamdarǵa asa qajet bolmasa kóshege shyǵý shektelgen;
- 14 jasqa deıingi balalardyń eresektersiz júrýine, otbasy múshelerinen basqa, úsh adamnan artyq adamdardyń jınalýyna tyıym salynady;
- qoǵamdyq tamaqtaný obektilerine kelýshilerdiń sany 30 adamǵa deıin shektelgen, áleýmettik ara qashyqtyq pen otyrǵyzý jáne jumys tártibi 08.00-den 22.00-ge deıin;
- buqaralyq (ujymdyq) is-sharalardy ótkizýge tyıym salynady;
-saýda-oıyn-saýyq ortalyqtarynyń, saýda úıleriniń (ortalyqtarynyń), azyq-túlik jáne azyq-túlik emes bazarlarynyń jumys kúnderi men demalys kúnderi jumys ýaqyty shekteýli. Demalys SOO, saýda úıleri jáne azyq-túlik emes dúkender saǵat 9.00-den 13.00-ge deıin jumys isteıdi. Bazarlar mindetti sanıtarlyq kúnge jabylady.
Oblystyń bas memlekettik sanıtar dárigeri qaraǵandylyqtardy osy talaptardy oryndaýǵa, óz densaýlyǵyn saqtaýǵa shaqyrdy.
Ol maska kııýdiń paıdasy joq degen pikirdi joqqa shyǵardy.
«Maska kııý ınfektsııanyń aldyn alýǵa kómektesedi. Maska, ony durys paıdalanǵan jaǵdaıda, juqtyrǵan adamnyń silekeı tamshylaryn ustap qalady. Sonymen qatar, ol aýyzdyń, murynnyń shyryshty qabattaryn kóptegen adamdardy las qoldardan keletin bakterııalardan qorǵaıdy. Deni saý adam vırýs juqtyrǵanbardyń ustaǵan zattaryna qolymen janasady, sodan keıin lastanǵan qoldarymen óz betin ustaıdy - osylaısha mıkroorganızmder murynnyń, aýyzdyń, kózdiń shyryshty qabattaryna túsedi jáne ımmýnıtet tómendegen kezde búkil aǵzaǵa taralady», - dep túsindirdi spıker.