Qaraǵandy oblysynda qar qursaýynda qalǵan 55 adam qutqaryldy
ASTANA. QazAqparat - Qaraǵandy oblysynda aýa raıynyń buzylýyna baılanysty (qar, jel, joldyń nashar kórinýi) «Ekaterınbor - Almaty» tas jolynda, Temirtaý qalasy aýmaǵynan Aqmola oblysy shekarasyna deıin jáne Qaraǵandy qalasy aýmaǵynan Balqash qalasyna deıin avtokólikterdiń barlyq túrleriniń qozǵalysyna shekteý qoıyldy.
Osakarov aýdanynda jol qozǵalysyna shekteý qoıylýyna qaramastan, «Almaty-Ekaterınbor» tas jolynyń 1141-shi shaqyrymynda 150 avtokólik qar keptelisinde qalyp qoıǵan. 12 jeltoqsanda 23:00-den 13 jeltoqsannyń 02:30 aralyǵynda Qaraǵandy oblysynyń TJD avarııalyq-qutqarý qyzmetiniń kúshteri, jergilikti atqarýshy organdary, jol polıtsııasy jáne jol tazartý mekemeleri birlesken áreketteriniń arqasynda qar qursaýynda qalǵan avtokólikterden 55 adam evakýatsııalandy, onyń ekeýi bala. Barlyq kóshirilgender Osakarovka kentiniń aýdandyq mádenı-saýyq ortalyǵyna ornalastyryldy, qýanyshtysy zardap shekkender joq. Bul týraly Qaraǵandy oblysynyń TJD habarlady. Sondaı-aq TJD turǵyndardy qolaısyz aýa raıynda jolǵa shyqpaýǵa keńes beredi.
«Qurmetti oblys turǵyndary men qonaqtary! Sizderdi BAQ men SMS-habarlamalary arqyly aýa raıynyń qaýipti jáne stıhııalyq qubylystaryn eskertýlerge nazar aýdarýlaryńyzdy suraımyz. Saq bolyńyzdar, aýa raıynyń ózgeristerin baqylap otyryńyzdar, balalardy qaraýsyz qaldyrmańyzdar. Alys jerlerge jolǵa shyǵarda aýa raıynyń ózgerýine sáıkes kıiný kerek. Alys jolǵa shyqpańyzdar, ásirese túngi ýaqytta jáne aýa raıy nasharlaǵan jaǵdaıynda», - dep jazylǵan habarlamada.
