Qaraǵandy oblysynda qar aralas burshaq jaýdy

QARAǴANDY. QazAqparat – Qaraǵandy oblysynyń Aqtoǵaı aýdanynda qar aralas burshaq jaýdy. Sınoptıkter jyl mezgiline tán emes tabıǵı qubylystyń osy aýdan arqyly ótken sýyq fronttyń saldarynan bolǵanyn aıtady, dep habarlaıdy QazAqparat tilshisi.

Jaz mezgiline tán emes tabıǵı qubylystyń vıdeosy áleýmettik jelilerde jarııalandy. Rolık avtorlary habarlaǵandaı, burshaq Aqtoǵaı aýdanynda jaýǵan. Bul aýdanda «Qazgıdromettiń» birneshe meteostantsııasy bar. Alaıda, mamandar burshaq túrinde jaýyn-shashyn bolǵany týraly málimet tirkelmegenin aıtady. Meteorologtar jaz aılarynda bolmaýy tıis tabıǵı qubylysty sýyq fronttarmen baılanystyrady.

«Keshe, 10 tamyzda Qaraǵandy oblysy frontaldyq bólimderdiń yqpalynda boldy. Aqtoǵaı aýdany arqyly ekinshi sýyq front ótti. Ádette, osyndaı fronttyń yqpalynan burshaq jaýýy múmkin. Búgingi kúni búkil Qazaqstan boıynsha, ásirese eldiń soltústik bóliginde jańbyr, naızaǵaı jáne burshaq jaýýy boljanyp otyr. Aqtoǵaı aýdanynda qos front ótti. Sonyń saldarynan burshaq jaýdy», - dep túsindirdi «Qazgıdromet» RMK Qaraǵandy oblystyq fılıalynyń ınjener-sınoptıgi Elena Mıhaılova.

Jaǵdaıǵa jergilikti atqarýshy organdar da túsinikteme berdi. Olardyń aıtýynsha, egin sharýashylyǵymen aınalysatyn sharýa qojalyqtary tabıǵı qubylystan zardap shekpegen. Burshaq jaýǵan aýyldyń aýmaǵynda egistik alqaptary joq.

«Aqtoǵaı aýdany Jıdebaı aýyldyq okrýgi Jalańash aýylynda jaýǵan. Aýyldyq okrýg ákimi Marat Tolepbekovpen osy másele boıynsha sóılestik, eginge jáne basqa da aýyl sharýashylyq ónimderine zardap kelmegendigi týraly habarlaımyz», - dedi Aqtoǵaı aýdany ishki saıasat bóliminiń basshysy Altaı Álibaev.

Vıdeodan alynǵan kadr