Qaraǵandy oblysynda qandaı aýyldardyń ákimderi saılanady
QARAǴANDY. QazAqparat – Qaraǵandy oblysynda 10 sáýirde ákimderdi saılaý júrgiziledi. Olar tek aýyldar men kentterde ǵana ótpeıdi. Halyq daýys berý arqyly Abaı qalasynyń ákimin saılaıdy, dep habarlaıdy QazAqparat tilshisi.
Aýmaqtyq saılaý komıssııasynyń habarlaýynsha, Abaı ákiminiń laýazymyna tórt kandıdat tirkelgen. Solardyń biri –qazirgi qala basshysy Medeý Ahmetov, ol Amanat partııasynyń atynan saılaýǵa túsedi. Oǵan ózin-ózi usynǵan eki memlekettik qyzmetshi – aýdandyq TKSh, jolaýshylar kóligi jáne avtomobıl joldary bóliminiń basshysy Aqnıet Abjatov jáne dene shynyqtyrý jáne sport bóliminiń basshysy Amangeldi Nurmuhanov básekeles bolady. Qazaqstannyń Halyq partııasynan saılaýǵa sport klýbynyń jattyqtyrýshysy Gúlnar Qosaeva qatysady.
Onynshy sáýirde sondaı-aq kelisi eldi mekenderdiń ákimderi saılanady:
- Jezqazǵan qalasynyń Keńgir kenti;
- Abaı aýdanynyń Esenkeldi jáne Qurma aýyldyq okrýgteri;
- Aqtoǵaı aýdany Shabanbaı aýyldyq okrýgi;
- Buqar Jyraý aýdany Kókpekti aýyldyq okrýginiń Aqtóre aýyly;
- Jańaarqa aýdany Taldybulaq aýyldyq okrýgi;
- Qarqaraly aýdany Temirshi aýyldyq okrýgi;
- Nura aýdanynyń Qulanótpes aýyly;
- Osakarov aýdanynyń Qaraǵaıly jáne Pıoner aýyldyq okrýgteri;
- Ulytaý aýdany Qarsaqpaı kenti.
