Qaraǵandy oblysynda qan aýrýlarymen naýqastanǵandardy emdeýge 2,9 mlrd teńge bólindi

QARAǴANDY. QazAqparat – Qaraǵandy oblysynda onkogematologııalyq aýrýlary bar naýqastardy tekserýge jáne emdeýge 2,9 mlrd teńge bólindi. Medıtsınalyq saqtandyrý qory TMKKK sheńberinde 2,7 mlrd teńge jáne MÁMS paketinen 200 mln teńgeden astam qarajat bólýdi josparlap otyr, dep habarlaıdy QazAqparat tilshisi.

Qan aýrýlary bar naýqastardy emdeý gematologııa ortalyǵynda ótedi. Ol Qaraǵandyda 2018 jyldyń tamyz aıynan bastap jumys isteıdi. Bıyl ol Qaraǵandy qalasy men Qaraǵandy oblysynyń gematologııa salasyndaǵy quzyrettilik ortalyǵy retinde úlken jeke ǵımaratqa kóshti.

Qazir ortalyqta qan aýrýlary bar patsıentter dıspanserlik esepke deıingi barlyq marshrýttan ótedi: kúndizgi jáne syrttaı konsýltatsııalardy qarastyratyn ambýlatorııalyq emdeý, tekserý kezeńi jáne táýlik boıy nemese kúndizgi statsıonarda emdeýden ótedi.

Ótken jyly Ortalyqtyń táýlik boıy jáne kúndizgi statsıonarlarynda Qaraǵandy jáne basqa oblystardan 2 myńnan astam patsıent emdeldi. 73–76 %-y qan qaterli isigi bar naýqastar.

«Qazir statsıonardy almastyratyn kómekke basty nazar aýdaryldy, kúndizgi statsıonarda bizde 16 tósek bar, bul bizge dıagnostıkalyq jáne emdik manıpýlıatsııalar júrgizýge múmkindik beredi. Naýqas óz úıinde qalady, emdelip, oralady, osylaısha biz aýrýhanaishilik ınfektsııalar qaýpin azaıtamyz. Qazir táýlik boıy aýrýhanaǵa tek aýyr naýqastar – jedel leıkozben aýyratyndar jatqyzylady. Hımıo-jáne joǵary dozaly terapııa júrgiziledi», – deıdi gematologııa salasyndaǵy quzyrettilik ortalyǵynyń dırektory Irına Balandınskaıa.

Táýlik boıǵy statsıonardaǵy patsıentter jergilikti jeldetý júıesi bar bir oryndyq palatalarda emdeledi. Árqaısysynda shuǵyl túrde reanımatsııalyq postty ornalastyrý úshin qajet nárseniń bári bar.

Gematologııalyq aýrýlary bar patsıentterdi tekserý jáne emdeý TMKKK jáne MÁMS paketteri esebinen júrgiziledi.