Qaraǵandy oblysynda qalaı onlaın qurban shalýǵa bolady

QARAǴANDY. QazAqparat - Bıyl Qurban aıt merekesi 31 shilde men 1-2 tamyzǵa keledi. Elimizde karantın sharalary qabyldanǵandyqtan qazaqstandyqtar qurbandyqty onlaın shalady. Ol úshin Qurban2020.kz saıty jumys istep tur, dep habarlaıdy QazAqparat tilshisi.

Qaraǵandy oblysynda merekeni onlaın rejımde ótkizý úshin shtab quryldy, onyń quramyna bes tehnıkalyq maman kiredi. Bul týraly óńirlik kommýnıkatsııalar qyzmetiniń tikeleı efırinde Qazaqstan musylmandary dinı basqarmasy oblystyq fılıalynyń basshysy, Qaraǵandy oblysynyń bas ımamy Ómirzaq Bekqoja málimdedi.

«Birinshiden, barshańyzdy eń uly jáne eń qasıetti Qurban aıtpen quttyqtaǵym keledi. Osy jyly QMDB sheshimi boıynsha ol onlaın rejımde ótedi. Bul degenimiz - múftııat ashqan Qurban2020.kz saıty arqyly árkim qurbandyq shala alady. Onyń basty betinde úsh uıashyq bar. Birinshisin basý arqyly siz qurbandyq shalý qyzmetine tapsyrys bere alasyz. Onda aımaqty atap ótý kerek, sodan keıin saýalnamany toltyryp, derekterińizdi qaldyrý kerek. Sodan keıin janýardy tańdaý kerek. Іri qara maldy, qoıdy, eshkini nemese túıeni qurban etýge bolady. Іri qara nemese túıe bir adamdy nemese jeti adamdy biriktire alady. Qoı nemese eshkini tek bir adam ǵana qurban etedi», - dedi Ómirzaq Bekqoja.

Saıt paıdalanýshysy janýardyń túrin tańdaǵannan keıin onyń quny avtomatty túrde paıda bolady. Sodan keıin elektrondyq tapsyrys nómiri shyǵady jáne tıisti somany kórsetiletin derektemeler boıynsha aýdarý qajet.

Ekinshi uıashyq muqtajdarǵa arnalǵan. Munda siz qurbandyq etin alýǵa ótinish bere alasyz. Ol úshin saıtta turatyn aımaqty kórsetý jáne tıisti áleýmettik mártebeni rastaıtyn qujattardy tirkeý qajet.

Qurban2020.kz saıtyndaǵy Qurban aıt týraly tolyq aqparatpen myna siltemede tanysýǵa bolady.