Qaraǵandy oblysynda qalaaralyq marshrýttarda jol aqysy eki ese arzandady
QARAǴANDY. QazAqparat – Kesheden bastap Qaraǵandy oblysynyń qalaaralyq marshrýttarynda jol aqysy 80 teńge bolady. Bul óńirde jol aqysyn tóleýdiń elektrondyq júıesi iske qosylýyynń arqasynda múmkin boldy, dep habarlaıdy QazAqparat tilshisi.
Búgin, 1 aqpanda Qaraǵandy oblysynyń qalaaralyq marshrýttarynda ONAY! jol aqysyn tóleýdiń elektrondyq júıesi iske qosyldy.
Jolaýshylar kóligi jáne avtomobıl joldary basqarmasy tasymaldaýshylarmen, sondaı-aq ONAY! kompanııasynyń ókilderimen birlesip júıeniń jumysyna monıtorıng júrgizdi.
Suraqtar týyndaǵan jaǵdaıda www.onay.kz saıtynda kórsetilgen meken-jaılarǵa júginýge bolady jáne kompanııanyń Instagram paraqshasynda – @onay.karaganda.
Sondaı-aq, Call-ortalyq operatorlaryna (8-7212) 50-60-50 nómiri boıynsha suraqtar qoıýǵa bolady. Qońyraýlar kún saıyn saǵat 06:30-dan 23:00-ge deıin qabyldanady.
Qaraǵandy oblysynda jeti qala mańyndaǵy marshrýttarmen júrý arzanyraq bolatyny osyǵan deıin aıtylǵan.
«ONAY elektrondyq júıesin paıdalaný tájirıbesi Qaraǵandyda oń nátıje berýde. Búgingi tańda tólemderdiń 96%-y elektrondy túrde ótýde. Bul júıeni qalaaralyq avtobýstarda, atap aıtqanda seriktes qalalarda engizý keıbir marshrýttarda jol júrý qunyn eki esege jýyq tómendetýge múmkindik beredi. Aıyrmashylyq aıtarlyqtaı», — dedi oblys ákimi Ermaǵanbet Bólekpaev.
Jańa tarıf aı saıyn 500 myńǵa jýyq jolaýshyny tasymaldaıtyn marshrýttarda júzege asyrylady.
Bul - № 100 jáne 107 (Qaraǵandy — Temirtaý), № 121 (Qaraǵandy — Shahtınsk), № 122 (Qaraǵandy — Topar), № 127 (Qaraǵandy — Shahan), № 146 (Qaraǵandy — Abaı) jáne № 165 (Qaraǵandy — Saran) avtobýstar.
Qala mańyndaǵy marshrýttarda elektrondyq bıletteý júıesi engizilgeli jolaýshylar QR, kólik kody nemese SMS kómegimen kólik kartasymen («Biryńǵaı», Virtual, «Áleýmettik», «Zeınetker») jol júrý aqysyn tólegen kezde 80 teńge tóleıdi.
«7-15 jastaǵy balalar» kartasy boıynsha jol júrý quny — 40 teńge.
Foto: gov.kz
