Qaraǵandy oblysynda qalaaralyq avtobýs jyraǵa qulap ketti
QARAǴANDY. QazAqparat – Qaraǵandy oblysynyń Saryshaǵan kentine jaqyn mańda qalaaralyq avtobýs aýdaryldy. Jol-kólik oqıǵasy saldarynan 10 adam zardap shekti, dep habarlaıdy QazAqparat tilshisi.
Oqıǵa 28 tamyz kúni «Almaty-Ekaterınbýrg» tasjolynyń 70-shaqyrymynda (Balqash qalasy) bolǵan. 61 jastaǵy «Setra» avtobýsynyń júrgizýshisi Qaraǵandyǵa kele jatyp, aınalma joldan túsý kezinde avtobýstyń jyraǵa qulap ketýine jol bergen. Aldyn ala derek boıynsha, júrgizýshi rýlge ıe bola almaı qalǵan.
Jol apatynan túrli jaraqat alǵan 31 jastaǵy jolaýshy medıtsınalyq mekemege jatqyzyldy.
«Almaty – Ekaterınbýrg tasjolynda avtobýstyń aýdarylýy saldarynan 10 adam zardap shekti. Saryshaǵan kenti, Balqash qalasy jáne Apattar medıtsınasynyń jedel járdem brıgadalary kómek kórsetti. 9 adam syrylǵan jáne soǵylǵan jaraqattar alǵan. Olar qajetti kómek kórsetilgennen keıin ambýlatorlyq emdeýge jiberildi. 1988 jylǵy áıeldiń bas-súıek mıy shaıqalyp, omyrtqasy jaraqattandy. Ol Balqash ortalyq aýrýhanasynda jatyr. Ómirine eshqandaı qaýip joq», - dep habarlady Qaraǵandy oblystyq Densaýlyq saqtaý basqarmasynyń baspasóz hatshysy Gýlıa Bagaýdınova.
Qazir atalǵan jaǵdaı boıynsha tıisti saraptamalar taǵaıyndaldy.
