Qaraǵandy oblysynda iri kásiporyndar aýyr júk kólikteri oıyp ketken joldardy jóndeıtin boldy

ASTANA. QazAqparat - Qaraǵandy oblysy ákimdiginde ótken apparattyq jınalys barysynda joldar máselesi talqylandy. Aımaq basshysy Erlan Qoshanov ónerkásip kásiporyndarynyń aýyr tehnıkasy eldi mekenderdegi joldardy qıratatynyn atap ótti. Oblys basshysy bul máseleni qarastyrýdy tapsyrdy, dep habarlaıdy óńirlik ákimdiktiń baspasóz qyzmeti.

«Búgingi tańda oblysymyzdaǵy joldardyń 25%-ynyń jaǵdaıy máz emes. Bul joldardy iri ónerkásip kásiporyndarynyń aýyr tehnıkasy buzǵan», - dedi Erlan Qoshanov.

Mysal retinde oblys ákimi jýyrda ǵana is sapary barysynda júrip ótken Qarqaraly-Qaraǵaıly tas jolyn keltirdi. Bul jolmen jáne kent ishindegi joldarmen «QarMys», «Qazaqmys» Korporatsııasy», «Alaıǵyr» kompanııalarynyń júk kólikteri júredi.

«Bul joldardy qalypta ustaýǵa qanshama bıýdjettik qarajat jumsaldy. Bir jyldyń ishinde onyń barlyǵyn buzyp tastaǵan. Qaraǵaıly kenti kósheleriniń boıymen kóptonnaly aýyr kólikter júrgen. Tek kólik ınspektsııasy men jergilikti polıtsııa qyzmetiniń aralasýymen ǵana eldi meken ishinde aýyr kólikterge júrýge bolmaıdy degen tyıym salý belgisi qoıylǵan. Sodan soń ǵana tártip ornatyla bastady. Búgingi kúni ol kompanııalar joldy qalpyna keltire bastady», - dedi Erlan Qoshanov.

Oblys ákimi osy sekildi jaıttar barlyq jerlerde kezdesetinin de aıtty. «Buqar Jyraý aýdanyndaǵy Botaqara-Toǵyzqudyq oblystyq mańyzy bar jolda da «Sát-Kómir» jáne «Razrez Kýznetskıı» kómir razrezderiniń úlken kólikteri júredi», - dep atap ótti oblys ákimi.

Aımaq basshysy Jolaýshy tasymaldaý kóligi jáne avtomobıl joldary basqarmasyna Kólik ınspektsııasy jáne aýdandyq ákimdermen birige otyryp, iri ónerkásip kásiporyndary paıdalanatyn oblystyq jáne aýdandyq mańyzy bar joldardyń jaǵdaıyn saraptap shyǵýdy tapsyrdy.

«Osy sekildi kásiporyndar joldardy jóndeý jáne qalypta ustaýda kómekterin tıgizýleri kerek. Bul máseleni qarastyrý qajet. Kentterdiń jáne aýyldardyń kóshelerimen aýyr júk kólikteriniń júrýine tyıym salynatyn belgiler ornatqan jón», - dedi Erlan Qoshanov.

Apparattyq jınalysta sonymen qatar avtojoldardyń shuńqyrly jóndeý jumystarynyń sapasyn qadaǵalaý qajettiligi de talqylandy. 2017 jyly respýblıkalyq mańyzy bar avtojoldardyń oıly-shuńqyrly jerlerin jóndeý jumystaryna 460 mln. teńge, oblystyq joldarǵa - 805 mln. teńge bólingen. Oblys ákimi barlyq qalalar men aýdandardaǵy jumys sapasynyń saraptamasyn talap etti.

Erlan Qoshanov, sonymen qatar, adam ólimi bolǵan jol apattary týraly da toqtaldy. «Ótken aptada Qaraǵandyda 9 jasar bala qaıtys boldy. BAQ apat bolǵan jerde jolaq joq ekenin, jáne de jaıaý júrginshiler belgisi tek joldyń bir shetinde ǵana bolǵany, onyń ózi aǵash butalarymen jabylyp qalǵany týraly jazyp jatyr. Turǵyndar narazy. Osyǵan deıin ákimdikke birneshe ret ótinish jazǵandaryn, biraq bul másele sheshilmegenin aıtady», - dedi oblys ákimi.

Aımaq basshysy Qaraǵandy qalasy ákimine jáne jergilikti polıtsııa qyzmetiniń basshylyǵyna jol belgilerin tekserip shyǵýdy tapsyrdy. «Aǵashtar ósip ketken jerlerde butalardy kesý kerek. Belgiler kózge kórinip turýy qajet! Bul tek Qaraǵandyǵa ǵana qatysty emes. Barlyq aımaqtarda osyndaı jumystar atqarylýy tıis», - dedi Erlan Qoshanov.