Qaraǵandy oblysynda iri bıznes tekserilip, bıýdjetke 47 mlrd teńge qaıtarylatyn boldy

QARAǴANDY. QazAqparat – Bıylǵy 9 aıda tek iri bıznesti tekserý nátıjesinde bıýdjetke 47 mıllıard teńge qaıtarylatyn boldy, dep habarlaıdy QazAqparat tilshisi.

Qaraǵandy oblysy boıynsha Memlekettik kirister departamenti 9 aıdaǵy qyzmetin qorytyndylady. Alqa jumysyna óńir basshysy Jeńis Qasymbek qatysty.

Memlekettik bıýdjetke bereshektiń edáýir kólemi iri salyq tóleýshilerdi tekserý kezinde tirkelgen. Kásipkerlerge 47 mıllıard teńge qosymsha esepteldi. Osy somadan naqty túsim shamamen 10 mıllıard teńge boldy.

Esepti kezeńde departament qyzmetkerleri zańsyz aınalymnan 32 myń lıtrden astam alkogol ónimin jáne 7 myńǵa jýyq temeki ónimin alǵan. Lıtsenzııanyń joqtyǵyna baılanysty 14 ákimshilik hattama jasaldy, temeki ónimderin satýshylarǵa 460 myń teńgege aıyppul salyndy.

«9 aı ishinde bıýdjettiń atqarylýy 100%-dan asty. «Qazaqmys» kompanııalar toby jańa Ulytaý oblysyna qaıta tirkegenine qaramastan, barlyq kórsetkishter oryndaldy. Sondaı-aq, biz jurtshylyqqa salyq salýdyń problemalyq máselelerin túsindirý boıynsha aýqymdy jumys júrgizip jatyrmyz. Jıi qoıylatyn eń ózekti suraqtardy daıyndadyq, broshıýra shyǵaryldy. Jadnama barlyq memlekettik kiris organdarynda bar, oǵan 50-den astam suraq engizilgen. Sonymen qatar, mektepterdiń 9-11 synyp oqýshylary úshin «Salyqtar degenimiz ne?» degen taqyrypta lektsııalar ázirlep, salyqtyń ne úshin tólenetinin túsindiremiz», - dep atap ótti Memlekettik kirister departamentiniń basshysy Ánýar Mádıev.

Alqa jumysynyń sońynda Jeńis Qasymbek MKD qyzmetkerlerin aldaǵy ulttyq valıýta kúnimen jáne qarjygerlerdiń kásibı merekesimen quttyqtady.