Qaraǵandy oblysynda ınvestıtsııa kólemi ulǵaıdy

QARAǴANDY. QazAqparat - Qaraǵandy oblysynda ınvestıtsııa kólemi artty. Óńirdiń negizgi kapıtalyna ınvestıtsııalar boıynsha naqty kólem ındeksi 103,4%-ben 580,2 mlrd teńgeden astam qarajat ıgerildi.

Qurylysta, aýyl sharýashylyǵynda jáne basqa da kórsetkishter boıynsha ósim tirkeldi, dep habarlaıdy QazAqparat Qaraǵandy oblysy ákimdiginiń baspasóz qyzmetine silteme jasap.

2021 jyldyń qańtar-qazan aılaryndaǵy óńirdiń áleýmettik-ekonomıkalyq damý qorytyndysy onlaın rejıminde ótken apparattyq keńeske shyǵaryldy.

– Salalyq basqarmalardyń málimetteri boıynsha, ónerkásipte naqty kólem ındeksi keminde 98,5%, kólemi 3 trln 352 mlrd teńgeni quraıdy dep boljanýda. Óńdeý ónerkásibinde ónim óndirý ótken jylǵy qańtar-qazanǵa qaraǵanda 99,5% deńgeıinde kútilýde. Taý-ken óndirý salasynda – 97,5%. 18,9% ósimmen 465,4 myń sharshy metr turǵyn úıdi paıdalanýǵa berý kútilýde, – dep baıandady ekonomıka basqarmasynyń basshysy Azamat Muqanov.

Mal sharýashylyǵy esebinen aýyl sharýashylyǵy salasynda da oń kórsetkishter baıqalady. Ónim shyǵarý 405,1 mlrd teńge kóleminde kútilýde – ósim 2,1%.

Oblys ákimi vedomstvolarǵa barlyq mindettemelerdi oryndaýǵa tapsyrma berdi.

– Ónerkásip jáne ındýstrııalyq-ınnovatsııalyq damý departamenti, qalalar men aýdandardyń ákimderi qosymsha sharalar qabyldap, jyl sońyna deıin ónerkásip óndirisiniń oń serpinine qol jetkizýdi qamtamasyz etýi, sondaı-aq ishki jáne sheteldik ınvestıtsııalardy tartý boıynsha kúsh-jigerdi jandandyrýy qajet, – dedi Jeńis Qasymbek.