Qaraǵandy oblysynda ınvestıtsııa kólemi artty
Qańtar aıyndaǵy oblystyń áleýmettik-ekonomıkalyq damý qorytyndysy onlaın rejıminde ótken apparat keńesinde shyǵaryldy.
«Ónerkásiptik ónim óndirisi 286,6 mlrd teńgeni qurady. 42% ósimmen negizgi kapıtalǵa 42,2 mlrd teńge kóleminde ınvestıtsııalar tartyldy. Qurylys jumystarynyń kólemi 1,3% artyp, 6,4 mlrd teńgeni qurady. 57,9 myń sharshy metr turǵyn úı paıdalanýǵa berildi – 2020 jyldyń deńgeıine qaraǵanda 1,2% artyq», - dep baıandady Ekonomıka basqarmasynyń basshysy Azamat Muqanov.
Esepti derekter boıynsha, óńirde kómir óndirý 12,5% artqan. Óńdeý sektorynda: metallýrgııada - 0,6%, hımııa ónerkásibinde - 8,2%, jeńil ónerkásibinde 33% ósim baıqaldy.
Oblysta kásipkerlik belsendilik artýda. Jumys istep turǵan ShOB sýbektileriniń sany qańtar aıynda 2,8% ósimmen 90,1 myń birlikti qurady.
Syrtqy saýdada da jandaný bar. Jalpy, taýar aınalymy 324,9 mln AQSh dollaryn qurady, bul 2020 jyldyń sáıkes kezeńimen salystyrǵanda 7,5% artyq. Qańtar aıynda Qaraǵandy oblysynan 296,6 mln AQSh dollaryna ónim eksporttaldy.
Іshki taýar aınalymy 146 mlrd teńgeni qurady.
Aýyl sharýashylyǵynda oń dınamıka saqtalýda. Qańtar aıynda 12,1 mlrd teńgeniń ónimi óndirildi, ósim – 2,3%.
«Jyl endi ǵana bastaldy. Biraq biz bolashaqqa jol ashamyz. 2021 jyly aldymyzǵa kólemi 6 trln teńgeden asatyn ekonomıkanyń 3,4% ósýin qamtamasyz etý mindetin qoıdyq. 700 mlrd teńgeden astam ınvestıtsııa josparlanǵan. Turǵyn úı qurylysyn tórtten birge arttyrýymyz kerek. Qańtar aıynda ınvestıtsııa tartý boıynsha jaqsy kórsetkishter bar. Bıyl birqatar iri ınvestıtsııalyq jobalar júzege asyrylady. Jeke ınvestıtsııalardyń ósýin kútemiz. Barlyq málimdelgen mindettemelerdi oryndaý qajet. Ónerkásiptiń damýy erekshe baqylaýda. Jumys oryndary men áleýmettik atmosfera osyǵan baılanysty», - dedi oblys ákimi Jeńis Qasymbek.
