Qaraǵandy oblysynda halyqqa áleýmettik qoldaý jan-jaqty kórsetilip jatyr

Atap aıtqanda, memleket tarapynan beriletin 42500 teńge tólemdi búginge deıin óńirde 102 myńnan astam turǵyn alyp úlgerdi. Kópti alańdatqan máseleniń biri – jumys oryndarynyń saqtalýy. Bul baǵytta da naqty sharalar iske asyrylyp jatyr. Aımaqta jumys oryndary qysqarmaıdy. Bul oraıda 161 óndiristik kásiporynmen memorandým jasalǵan. Olarda 75 myń jumys orny bar.

Aımaqtaǵy áleýmettik ahýal men turǵyndarǵa kórsetiletin kómek haqynda Qaraǵandy oblysy ákiminiń orynbasary Abzal Núkenov pen oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Ásem Júnisbekova qatysqan brıfıngte baıandaldy.

Jumys oryndary qysqarmaıdy

Brıfıng barysynda Abzal Núkenov oblys basshylyǵynyń jumys oryndaryn saqtaý boıynsha atqaryp jatqan jumystaryna toqtalyp ótti.

«Osydan bir-eki apta buryn úlken óndiris oryndarymen tıisti memorandýmǵa qol qoıyldy. Qujattyń negizgi mazmuny – jumys oryndaryn qysqartpaı, barynsha saqtap qalýǵa tyrysý. ıAǵnı, memorandým aıasynda aımaqtaǵy 161 kásiporyn osyndaı mindetteme aldy. Sonymen qatar, «Eńbek» nátıjeli jumyspen qamtý jáne kásipkerlikti damytý baǵdarlamasy aıasynda 43 myńnan astam azamatty jumyspen qamtýdy josparlap otyrmyz», – dedi oblys ákiminiń orynbasary.

Daǵdarysqa qarsy sharalardyń biri «Jol kartasy» baǵdarlamasy bolsa, qazirgi ýaqytta osy kartanyń «qorjynynda» jalpy quny 63,7 mlrd. teńgeni quraıtyn 625 joba bar. Atalǵan jobalar jalpy sany 16 106 jumys ornyn, onyń ishinde, 712 turaqty jumys ornyn usynbaq.

102 myń adam áleýmettik tólem aldy

Memleket basshysy Qasym-Jomart Toqaev tótenshe jaǵdaı men karantın rejımine baılanysty tabysynan aıyrylǵan qazaqstandyqtarǵa 42 500 teńge kóleminde áleýmettik járdemaqy tóleýdi tapsyrǵany málim.

Oblys ákimi orynbasarynyń aıtýynsha, búginde Qaraǵandy oblysy boıynsha áleýmettik tólem alýǵa 229 myńnan astam azamat ótinish bergen. Olardyń ishinde 90 myńǵa jýyq ótinimniń durys toltyrylmaǵany jáne talapqa saı kelmeıtini anyqtaldy.

«Al, 117 myńnan astam azamatqa áleýmettik kómek berý týraly sheshim qabyldandy. Olardyń 102 myńnan astamy búginde 42 500 teńgeni alyp úlgerdi. Tótenshe jaǵdaı rejımi sozylǵan jaǵdaıda kómekti berý jalǵasady» – dedi A.Núkenov.

Qazirgi tańda oblys boıynsha 14 000 otbasy – memlekettik járdemaqy, 3 677 otbasy ataýly áleýmettik kómek alýda. Sońǵy úsh aıdyń ishinde 4 624 balaǵa kepildi áleýmettik kómek kórsetildi. Tótenshe jaǵdaıǵa baılanysty tikeleı qarym-qatynastyń shektelýine oraı, І toqsanda AÁK alǵan azamattardyń ony alý merzimi ІІ toqsanǵa uzartyldy. Al, bul kómekke jańadan ótinish beretin azamattar e.gov.kz portaly arqyly onlaın ótinim jibere alady. Eger kompıýter nemese basqa da gadjetter qoljetimsiz bolsa, jergilikti ákimdiktiń kómegine júginýi kerek.

Jumyspen qamtýdy úılestirý jáne áleýmettik baǵdarlamalar basqarmasynyń basshysy Ásem Júnisbekova: «Memleket basshysynyń tapsyrmasy boıynsha tótenshe jaǵdaı kezinde qosymsha qoldaý sharalary kórsetiledi. Atap aıtqanda, AÁK alatyn otbasylardaǵy 6 jastan 18 jasqa deıingi balalar, І, ІІ jáne ІІІ toptaǵy múgedekter, múgedek balalar jáne olardyń kútimine jaýap beretin tulǵalar, resmı tirkelgen jumyssyzdar azyq-túlik jáne turmystyq jıyntyqtarmen qamtamasyz etiledi. Ol úshin eshqaıda baryp, ótinish berýdiń qajeti joq. Kómek alýshylardyń tizimi jasaqtalǵan. Naýryz aıynda 6 316 balaǵa kómek kórsetildi. Al, sáýir aıynda osy kómekti 76 myńnan astam adam alady», – dedi.

Qaraǵandyda karantın jarııalanǵaly indetti jeńý baǵytynda qyrýar sharýa tyndyryldy. Atap aıtqanda, 16 naýryzdan bastap kópbalaly jáne az qamtylǵan otbasylarǵa, jalǵyzilikti qart adamdarǵa, múgedekterge kómek kórsetý jónindegi 163 aktsııa ótkizildi. Jalpy 26 167 adam qamtylyp, 21 mln. teńgeden astam qarajatqa azyq-túlik sebepteri daıyndaldy. 61 tonnaǵa jýyq azyq-túlik, sanıtarlyq-gıgıenalyq jáne turmystyq zattar taratyldy. 23 myń dana betperde tigilip, halyqqa usynyldy. Sonymen birge, alǵy shepte júrgen aq halatty abzal jandardy qoldaý sharalary da der kezinde jasalýda. Respýblıkalyq bıýdjetten 1 349 medıtsınalyq qyzmetkerge ústemaqy tólense, kúni keshe oblys qarjysy esebinen taǵy 1 677 dáriger aılyq eńbekaqysy mólsherinde syıaqy aldy.

«Birgemiz» qory qolushyn sozdy

Qazirgi tańda Úkimet pen jergilikti bılik kún-tún demeı, indetti jeńýdiń strategııasyn qarastyryp jatqany aıan. Memleket tótenshe jaǵdaıda jumysynan aıyrylǵan áleýmetti qoldaý úshin arnaıy qarjy qarastyrdy. Budan bólek, Elbasynyń bastamasymen qurylǵan «Birgemiz» qoǵamdyq qory arqyly da muqtaj jandarǵa 50 myń teńge kóleminde járdem berilip jatqany belgili. Oblysta bul jumys Birgemiz-Qaragandy óńirlik qory arqyly júzege asyp jatyr.

«Nur Otan» partııasy oblystyq fılıaly tóraǵasynyń birinshi orynbasary Qadısha Ospanovanyń aıtýynsha, qazirgi kúnge deıin Qaraǵandy óńirinde atalǵan qor arqyly 7 sanat negizinde 13 674 adamnyń esepshotyna qarjy aýdaryldy. Olar Qaraǵandy, Temirtaý, Jezqazǵan qalalarynyń turǵyndary ekenin de atap ótken jón.

Aıta ketý kerek, partııa tarapynan atqarylyp jatqan bul jumys ári qaraı jalǵasyn tabady. Oblysta 7 sanat boıynsha taǵy 18 383 turǵyn áleýmettik qoldaýmen qamtamasyz etiledi. 19 sáýirge deıin osy qarajatty alatyndar tizimi naqtylanady.

Oblystaǵy 3 myń otbasyna 35 mln. teńge kóleminde áleýmettik paket túrinde kómek berildi. Sonymen qatar, áleýmettiń belgili bir tobyna azyq-túlik, turmysqa qajetti zattar jıyntyǵyn úlestirý jalǵasýda. Sáýir aıynda jalpy somasy 417 mln. teńgeni quraıtynan osyndaı jıyntyqty áleýmettik áljýaz tobyndaǵy 75 myń adamǵa tabystaý kózdelýde.

Memleket bir de bir azamatyn qamqorlyqsyz qaldyrmaıtynyn aıtty. Elde senim – zor. Sebebi, bul is – esep úshin emes, erteń úshin ekenine kúmán-kúdigi qalmady.

Kásipkerler kómegi qomaqty

Búginde Qazaqstannyń ár aımaǵynda jomart azamattar aspandy bult torlaǵanda buǵyp qalmaıtynyn kórsetti. Elbasy Nursultan Nazarbaevtyń eldegi kásipkerlerge úndeý tastaýy – qıyn sátte qol ushyn sozýǵa daıyn adamdardyń bar ekenin aıǵaqtady. Qoǵamdyq qorǵa – indetpen kúreske tolassyz qarjy aýdaryp jatqan el azamattary barshylyq.

Olar jalpy qoǵamǵa jasaǵan qamqorlyǵyn jarııa etýdi qup kórmeıdi. Desek te, jaqsynyń jaqsylyǵyn aıtý – paryz. Alysqa barmaı-aq, Qaraǵandy aımaǵynda búgingi ahýalǵa beı-jaı qaramaǵan atpal azamattardyń qarasy – tym qalyń.

Qaraǵandy oblysy dzıýdo federatsııasynyń vıtse-prezıdenti Ǵabdolla Dúısenbaev ekspress-testiler alýǵa 5 mln. teńge qarajat bóldi. Qala turǵyny Vladımır Nefedov 1 mln. teńgege turǵyndarǵa azyq-túlik taratty.

«YDD Corporation» Qaraǵandy ferroqorytpa zaýyty tótenshe jaǵdaı barysynda memleket qabyldaǵan is-sharalardy qoldaý úshin Qaraǵandy oblysynda qurylǵan qorǵa 100 mln. teńge bóldi.

«Nátıje» sút fabrıkasy karantındik aýrýhanalarda jumys isteıtin dárigerlerge sút ónimderin tegin jetkizedi. «Ryspaev» jeke kásipkerligi oblystyq medıtsınalyq ortalyqtyń 60 dárigerine qonaqúıin usyndy. «Kosmonavt» qonaqúıi de solaı.

«Bıpek Avto» kompanııasy epıdemıologtarǵa ınfektsııalyq oshaqtardy anyqtaý jumystaryn júrgizý úshin 7 avtokólik berdi.

«Altyn Arba» bazary 1000 otbasyǵa tegin azyq-túlik jetkizdi. №3 avtoparki kólikterin berip, oblystyq qorǵa 5 mln. teńge aýdardy.

«Taır» saýda úıiniń ákimshiligi ózderindegi jeke kásipkerlerden jalǵa alý qunyn almaý týraly sheshim shyǵardy. Mundaı mysaldar qatary kúnnen-kúnge artyp keledi. Biz beıbit kúnde baıbalam salyp, izdep júrgen ulttyq býrjýazııa – osy eken.

Jıyrmasynshy ǵasyrdyń basynda «Ultyna qyzmet etetin baılardy Alla kóbirek bersin, dáýletiniń eki dúnıede ıgiligin kórsin!» dep duǵa oqyp, «Qysylyp turǵanda demeý boldy, Táńiri jarylqasyn!» degen qazaq oqyrmanynyń tilegin biz de osy kúni qaıtalaǵan jaıymyz bar.

Áıteke bıdiń «Baı bolsań, halqyńa paıdań tısin, batyr bolsań, jaýǵa naızań tısin, baı bolyp, elge paıdań tımese, batyr bolyp, jaýǵa naızań tımese, elden bóten úıiń kúısin» degen danalyq sózi – talaı qazaqtyń balasyna qamshy...

Eriktilerge el senimi eresen

Jasyratyny joq, eriktilerdiń de erlikke para-par eńbegin erekshe ataýǵa tıispiz. Derekterge júginsek, eriktilerdiń atqarǵan jumysynyń aýqymyna razy bolasyz.

Joǵaryda aıtyp ótkenimizdeı, 16 naýryzdan búgingi kúnge deıin volonterler kásipkerlerdiń járdemdesýimen kópbalaly jáne az qamtylǵan otbasylarǵa, jalǵyzbasty qarttarǵa, múgedekterge jáne muqtaj jandarǵa tynymsyz kómek kórsetýde. Osy aralyqta 163 aktsııa ótkizilgen eken. Onymen 8 242 otbasy qamtylǵan.

Muqtaj jandarǵa jalpy somasy 21 mln. teńgeden astam qarajatqa azyq-túlik sebepteri daıyndalǵan kórinedi. 61 tonnaǵa jýyq azyq-túlik, sanıtarlyq-gıgıenalyq jáne turmystyq zattar taratylypty. Qazir 1 196 volonter oblys kóleminde elge járdemin tıgizip júr.

2020 jyldyń 7 sáýirinen bastap Qaraǵandy oblysynda «Saryarqa jastary» oblystyq volonterler shtabynyń qurylýy olarǵa degen el arasyndaǵy senimdi kórsetse kerek. Shtabqa turǵyndar tegin azyq-túlik sebetterin, dúkennen azyq-túlik, dárihanadan dári-dármek jetkizý, volonter qataryna qosylý syndy máselelermen habarlasady eken.

Bastaryn báıgege baılaǵan eriktilerdiń isi de óz kezinde elden de, tarıhtan da laıyqty baǵasyn alary daýsyz.

Syn saǵatta Qazaqstan halqy Assambleıasy da syrt qalǵan joq. Bir ǵana mysal, Qaraǵandy oblysy QHA múshesi – «Tatar jáne bashqurt Qazaqstan kongresi» RQB fılıalynyń tóraǵasy Shamıl Osın turmysy tómen otbasylarǵa 12 tonna azyq-túlik pen kókónis jetkizip berdi. Al, tájik etnomádenı birlestiginiń ókilderi Ánet baba meshitiniń ortalyq shtabyna alǵashqy qajettilik sanatyndaǵy azyq-túlikterdi taratty. Mundaı mysaldar óte kóp. QHA ókilderiniń kómegi óńirdegi aýdan-qalalarda ári qaraı jalǵasyn tabýda.

Túıin

Tótenshe jaǵdaıǵa májbúr bolǵan, álemdegi ekonomıkalyq daǵdarystyń salqynyn sezingen elimiz etek-jeńin taǵy bir márte jınap, bolashaq úshin batyl sheshimder qabyldaýda. El tilegi – jalqy ári ámbege aıan. Kúrdeli kezeńdi birge eńserý, eńsemizdi qaıta tikteý. Úreıdi úmitke jeńdirip, keler kúnniń bir shókim bultsyz kókjıegine kóz tigedi buqara. Biz – birgemiz!

Avtory: Qyzǵaldaq Aıtjanova