Qaraǵandy oblysynda halyqaralyq sertıfıkatsııasy bar geologııalyq zerthana salynady
ASTANA. QazAqparat - Qaraǵandy oblysynda geologııalyq synamalardy taldaýǵa arnalǵan zerthananyń qurylysyn júrgizýde. Bul týraly aımaqta geologııalyq salany damytý perspektıvalary jónindegi keńes barysynda «Qazgeologııa» AQ basqarma tóraǵasy Ǵalym Nurjanov málimdedi, dep habarlaıdy oblys ákiminiń baspasóz qyzmeti.
«Halyqaralyq sertıfıkatsııasy bar zerthananyń qurylysy boıynsha josparlar bar. Qazaqstanda synamalardy taldaý boıynsha zerthana bar, biraq qarjy ınstıtýttary olardyń málimetterin qabyldamaıdy, óıtkeni sertıfıkattaýdyń halyqaralyq standarty joq», - dedi Ǵalym Nurjanov.
Zerthana Qaraǵandy oblysynda salynady, óıtkeni, bul ortalyq aımaq, dedi ol. Munda barsha Qazaqstannan synamalar jetkiziletin bolady.
Jobany «Qazgeologııa» avstralııalyq kompanııamen birge júzege asyrady. Aldyn ala esepteýler boıynsha, jobanyń quny - 1,5 mlrd. teńgege jýyq. Joba 2018 jyly iske asyrylmaq.
«Bul zerthana taǵy ne úshin kerek? Bizdiń synamalar shetelge shyǵarylady dep kóbi shaǵymdanady. Al zerthana barlyq málimetterdi Qazaqstanda qaldyryp, barlyq synamalardy ózimizde óńdeýge múmkindik beredi», - dedi Ǵalym Nurjanov.
«Qazgeologııa» AQ memlekettik tapsyrys boıynsha Qaraǵandy oblysynda geologııalyq barlaý jumystaryn júrgizýde. Basty maqsaty - shıkizat bazasyn tolyqtyrý. Búginde Balqash, Jezqazǵan, Sátbaev monoqalalarynyń aınalasynda onǵa jýyq joba oryndaldy. 2017 jyly jumystar jalǵasyn tabady.
Sonymen qatar, óńirde birneshe iri sheteldik kompanııa ken oryndaryn barlaýmen aınalysady. «Qazgeologııa» AQ málimetinshe, sońǵy úsh jylda Qaraǵandy oblysynda geologııalyq barlaýǵa jumsalǵan ınvestıtsııalar shamamen 9 mlrd. teńgeni qurady.
