Qaraǵandy oblysynda halyq teatrlarynyń úzdik rejısseri tańdaldy
Qarqaralyda «Teatr – tárbıe besigi» teatr festıvaliniń qorytyndysy shyǵaryldy. Eki aptaǵa jýyq halyq teatrlarynyń ártisteri kórermenderdi jarqyn qoıylymdarmen jáne shyǵarmashylyq sahnalyq beınelermen qýantty.
Festıval qazaq kásibı teatr óneriniń negizin qalaýshylardyń biri – Qalıbek Qýanyshpaevtyń 130 jyldyq mereıtoıyna arnalǵan.
«Úzdik rejısser» ataǵy M. Rymjanov atyndaǵy «Abyz» halyq teatrynyń jetekshisi Baný Muqashevaǵa berildi. Ol kórermender men teatr synshylarynyń nazaryna Sopy Smataevtyń «El urany – Qarqabat» atty pesasyn usyndy.
«Qoıylymda biz Qarqabat ana beınesin ashýǵa tyrystyq. Biz sol kezdegi atmosferany jetkizý úshin barymyzdy saldyq. Qazir kóptegen jastar Uly dalanyń anasy týraly bilmeıdi. Men ómir boıy Qarqaraly gazetinde tilshi bolyp jumys istedim. Sonymen qatar teatrdy basqardym. Zeınetkerlikke shyqqannan keıin onyń ómirine etene aralastym. Trýppamen birge biz kórermenderge»Elim-aı«,»Shyrǵalań«,»Birjan sal«,»Bir ýys dán«,»Mahabbat kópiri«,»Sholpannyń juldyzy«,»Jaý tylyndaǵy bala«sııaqty qoıylymdardy syıǵa tarttyq. Olardyń barlyǵyn jurtshylyq jaqsy baǵalady. Maǵan berilgen nomınatsııa – bul bizdiń búkil ujymnyń jeńisi», – deıdi Baný Muqasheva.
Baný Muqasheva – Qazaqstan Jýrnalıster Odaǵynyń múshesi, Qaraǵandy oblysy ákiminiń «Altyn suńqar» syılyǵynyń laýreaty, «Eńbek dańqy» jáne taǵy basqa medaldermen marapattalǵan.
Sondaı-aq, teatr synshylarynan quralǵan arnaıy komıssııa erler men áıelder rólderiniń úzdik oryndaýshylaryn, satıralyq janrdaǵy úzdik akterlerdi, epızodtyq róldi, úzdik daýys ıegerin jáne basqa da birqatar nomınatsııalar boıynsha laýreattardy tańdady.
«Festıval jyl saıynǵy dástúrge aınaldy. Bıyl ol altynshy ret ótkizildi. Barlyq halyq teatrlary ózderiniń úzdik qoıylymdaryn usyndy. Egindibulaq halyq teatry Serik Saǵyntaıdyń»Ahmet – Ult muǵalimi«týyndysy boıynsha sahnalanǵan qoıylymdy usyndy. Atyǵaı Shanın atyndaǵy teatr –»Taqııaly Perishte«qoıylymymen qýantty. Táttimbet aýylynyń teatry óte ótkir taqyrypty kóterdi. Ol J. Almashulynyń»Qaladaǵy pater«shyǵarmasy boıynsha qoıylym kórsetti. Bul ómir súrý úshin qalaǵa kóship, sol jerde qıyndyqtarǵa tap bolǵan jas otbasy jaıly qazirgi ýaqyttyń shyndyǵyn kórsetedi. Festıval bolashaqta anaǵurlym aýqymdyraq bolady dep úmittenemiz», – dep atap ótti Qarqaraly aýdanynyń mádenıet jáne tilderdi damytý bóliminde.
