Qaraǵandy oblysynda halyq sanaǵy qalaı júrgiziledi

QARAǴANDY. QazAqparat - 1 qyrkúıekten bastap Ulttyq halyq sanaǵynyń negizgi kezeńi bastalady. Onlaın rejıminde ótken apparattyq keńeste búkil el úshin mańyzdy is-sharaǵa daıyndyq barysy talqylandy, dep habarlaıdy QazAqparat tilshisi.

Sanaqtyń daıyndyq kezeńi 31 maýsymda aıaqtaldy. Statıstıka departamentiniń ıntervıýerleri barlyq úılerdi aralap shyqty. Olar oblysta turatyndardyń naqty sanyn naqtylady. Aldyn ala málimetter boıynsha, halyq sany 1 mln 343 myń 598 adamdy quraıdy.

«Tizimge kirgen barlyq 565 myń sanaq nysandarynyń meken-jaıy naqtylandy. Bul rette mekenjaı tirkelimi derekter qorynda esepte turǵan jáne sanaqtyń negizgi kezeńi úshin nysandar qataryna kirmeýi tıis isten shyqqan 19 myń úı-jaı (páter) anyqtaldy. Qazir sanaqtyń negizgi kezeńi úshin aýdandastyrý júrip jatyr. Jumystardy aıaqtaý 25 tamyzǵa josparlanǵan», - dep habarlady Qaraǵandy oblysy boıynsha Ulttyq statıstıka bıýrosy departamentiniń basshysy Janat Sadyqova.

Onlaın-rejımdegi halyq sanaǵy bir jarym aıdy quraıdy – 1 qyrkúıekten 15 qazanǵa deıin. Qaraǵandylyqtar saýalnama paraqtaryn úıden nemese mobıldi ınternetten onlaın toltyra alady, nemese «Azamattarǵa arnalǵan úkimet» front-keńsesine barýǵa bolady.

Úıdi aralaý 1-30 qazan aralyǵynda ótedi.

Sanaq júrgizý úshin 1890 adamdy ýaqytsha jumysqa tartý josparlanýda. Jumyspen qamtýdy úılestirý jáne áleýmettik baǵdarlamalar basqarmasynyń aqparaty boıynsha, jumyspen qamtý ortalyqtarynda esepte turǵan 1289 jumyssyz tartylady.

«Biz halyq sanaǵynyń mańyzdylyǵy men ózektiligin túsinýimiz kerek. Júrgizilgen jumystyń qorytyndysy eldegi ekonomıkalyq, demografııalyq jáne áleýmettik ózgeristerdi kórsetedi. Bul aýqymdy aktsııa asa mańyzdy taldamalyq derekterdi, onyń ishinde halyqtyń naqty sanyn, jas jáne genderlik quramyn, ýrbandalý dárejesin jáne óńirdi damytý úshin negizdelgen basqarýshylyq sheshimder qabyldaý úshin qajetti basqa da málimetterdi alýǵa múmkindik beredi», - dep atap ótti oblys ákimi Jeńis Qasymbek.