Qaraǵandy oblysynda «Gazel» kóligin jóndep jatqan er adamdy qaǵyp óltirdi
TEMІRTAÝ. QazAqparat – Qaraǵandy oblysynda «Gazel» júrgizýshisi joldyń shetinde júk kóligin jóndep jatqan er adamdy qaǵyp ketti. Ol alǵan jaraqattarynan oqıǵa ornynda kóz jumdy, dep habarlaıdy QazAqparat tilshisi.
Oqıǵa 13 qazanda «Almaty-Ekaterınbýrg» avtojolynda boldy. «Gazel» avtokóliginiń 38 jastaǵy júrgizýshisi Temirtaý qalasynan Nur-Sultan qalasy baǵytynda kele jatqan. Anyqtalǵandaı, 58 jastaǵy zardap shegýshi jol jıeginde óziniń júk mashınasyn jóndep jatqan. Jol apaty saldarynan ol oqıǵa ornynda qaza boldy.
«Atalǵan fakti boıynsha QR QK-niń 345-baby 3-bóligi «Abaısyzda adam ólimine ákep soqqan jol qozǵalysy erejelerin buzý» boıynsha qylmystyq is qozǵaldy. Tergeý júrip jatyr», - dep habarlady Qaraǵandy oblysy Polıtsııa departamentiniń baspasóz qyzmetinen.
