Qaraǵandy oblysynda gaz ballony jarylyp, eki kólik órtenip ketken

QARAǴANDY. QazAqparat - Ótken táýlikte Qaraǵandy oblysy tótenshe jaǵdaılar departamentiniń bólimsheleri 14 ret qutqarý jumysyna shyqty. Óńir boıynsha alty órt aýyzdyqtaldy. Saldarynan bir adam kóz jumyp, eki kólik tolyqtaı janyp ketken, dep habarlaıdy QazAqparat tilshisi.

Oblystyq TJD málimdegendeı, ot sharpyǵan ǵımarattardyń basym bóligi – jeke úıler.

Órt sóndirýshiler Osakarov aýdany, Temirtaý, Prıozersk qalalarynda tilsiz jaýmen kúresken.

Qaraǵandy qalasynda órt sóndirý kezinde gaz ballony jarylyp, eki avtokólik janyp ketken.

«Qaraǵandy qalasy Balqash kóshesinde jeke turǵyn úıdiń aǵash jabyny, tóbesi, qalqalary, terezesi, esik bloktary, jıhazdary men turmystyq zattary, sonymen qatar garajdyń edeni, ishinde eki avtokólik - jalpy aýdany 280 sharshy metr aýmaq jandy. Órtti sóndirý kezinde gaz-aýa qospasy shyǵyp, keıin garaj ishindegi gaz ballony jarylǵan. Qaza bolǵandar men zardap shekkender joq. Órttiń shyǵý sebebi anyqtalýda», - dep málimdedi vedomstvoda.

Shahtınsk qalasynda bolǵan órt saldarynan bir adam kóz jumdy.

«Shahtınsk qalasy Dolınka aýylynda jeke turǵyn úıdiń aǵash jabyndysy, tóbesi, qalqalary, terezesi, esik bloktary, sonymen qatar ishki úı jıhazdary, jalpy alańy 80 sharshy metr aýmaq janyp ketti. Órt ornynan 1985 jyly týǵan páter ıesiniń máıiti tabyldy. Órttiń shyǵý sebebi anyqtalyp jatyr», - dep habarlady TJD baspasóz qyzmeti.