Qaraǵandy oblysynda et pen sút ónimderi kóbirek óndirile bastady
QARAǴANDY. QazAqparat – Qaraǵandy oblysy áleýmettik-ekonomıkalyq damýdyń oń dınamıkasyn saqtap otyr. Aýyl sharýashylyǵy salasy qarqyndy damyp keledi, óńirdiń fermerleri et pen sút óndirisin arttyrdy, dep habarlaıdy QazAqparat tilshisi.
Óńirdiń áleýmettik-ekonomıkalyq damýynyń aldyn ala qorytyndylary onlaın rejıminde apparattyq keńeste talqylandy.
«Aýyl sharýashylyǵynda 2,5% ósimmen 339,4 mlrd teńgeniń ónimi shyǵarylady dep kútilýde. Mal sharýashylyǵynda kólem 3,5%-ǵa, ósimdik sharýashylyǵy 0,1%-ǵa ulǵaıdy. Oblysta iri qara mal sany 605,8 myń basqa, jylqy – 437,4 myń, qoı – 825 myń, eshki – 219,1 myń basqa jetti», – dep habarlady ekonomıka basqarmasynyń basshysy Azamat Muqanov.
Et óndirisi 3,5%-ǵa artyp, shamamen 105 myń tonnany, sút – 411,9 myń tonnany qurap, 4,1%-ǵa artty.
Ónerkásip ónimi 3 trln teńgege óndirildi. Metallýrgııa ónimderin shyǵarý ulǵaıdy. Bolat óndirisinde kólemi 2 793,9 myń tonnany qurap, 19,4%-ǵa, jazyq ılek – 16,9%-ǵa (2 202,6 myń tonna), shoıyn – 15,1%-ǵa (2 587,6 myń tonna) ósý boljanyp otyr.
Oblystyń negizgi kapıtalyna ınvestıtsııalar boıynsha 5,1% ósimmen shamamen 537 mlrd teńgeni ıgerý kútilýde.
Oblys ákimi Jeńis Qasymbek damý qarqynyn báseńsitpeý jáne barlyq baǵyttar boıynsha josparlanǵan kórsetkishterge qol jetkizý boıynsha tapsyrmalar berdi.
«Jalpy, barlyq kórsetkishter boıynsha oń dınamıka bar. Investıtsııalar boıynsha jaqsy qarqyn baıqalýda. Jalpy bólingen qarjynyń 90%-yn jeke ınvestıtsııalar quraıdy. Bul qolaıly ınvestıtsııalyq klımattyń baryn kórsetedi, ınvestorlar aımaq áleýetine senedi. Aýyl sharýashylyǵynda mal sharýashylyǵynda da, ósimdik sharýashylyǵynda da jaqsy nátıjeler bar», – dep atap ótti óńir basshysy.
Qaraǵandy oblysynda 2021 jylǵa ekonomıka ósimi 3,4% quraıdy dep josparlanǵan.
