Qaraǵandy oblysynda eriktiler qyzmetin damytý úshin grantqa ótinim qabyldaý bastaldy

QARAǴANDY. QazAqparat – Qaraǵandy oblysynda eriktiler qyzmetin damytý jáne qoldaýǵa arnalǵan granttardy taǵaıyndaý boıynsha konkýrsqa ótinim qabyldaý bastaldy. Granttar jergilikti bıýdjet qarajaty esebinen bólinedi, dep habarlaıdy QazAqparat tilshisi.

Konkýrsqa jeke tulǵalar, bastamashyl toptar, sondaı-aq Qaraǵandy oblysynyń úkimettik emes uıymdary qatysa alady. Jeke ótinim bergen jaǵdaıda ótinim berýshi 18 jastan joǵary bolýy tıis. Eger ótinim bastamashyl toptan berilse, onda basshy 18 jastan asqan bolýy tıis. Toptyń qalǵan múshelerine qoıylatyn talaptar – qatysýshylardyń jasy 14-ten joǵary bolýy qajet. Konkýrsqa qatysýǵa ótinimdi bastamashyl toptyń basshysy onyń barlyq múshelerin kórsete otyryp berýi tıis. Konkýrsqa qatysatyn úkimettik emes uıymdar Qazaqstan Respýblıkasynyń qoldanystaǵy zańnamasyna sáıkes tirkelýi tıis.

Ótinimder BIRGEMIZ jalpyulttyq jobasynyń jeti baǵyty boıynsha qabyldanady:

1. Birgemiz: Bilim - UBT-ǵa daıyndalýǵa kómektesý, aǵylshyn tilin, orta mektepterdiń joǵary synyp oqýshylaryn kompıýterlik saýattylyqqa úıretý jáne osy baǵytqa sáıkes keletin basqa da jobalar.

2. Birgemiz: Saýlyq - bul densaýlyq saqtaý salasy, naýqastardy kútýge kómek, sonyń ishinde hospısterde, onkologııalyq dıspanserlerde jáne osy saladaǵy basqa da jobalar.

3. Birgemiz: Sabaqtastyq - balalar úıindegi balalar men jastarǵa, qıyn ómirlik jaǵdaıǵa tap bolǵan balalarǵa, halyqty áleýmettik qorǵaý júıesiniń áleýmettik qyzmet kórsetý ortalyqtarynda tálimgerlik jáne osy taqyrypqa sáıkes keletin basqa da jobalar.

4. Birgemiz: Taza Álem - qorshaǵan ortany qorǵaý, ózender men ormandardy tazartý, aǵash otyrǵyzý, qoqysty suryptaýǵa úıretý jáne osy baǵyttaǵy basqa da jobalar.

5. Birgemiz: Asyl mura - tarıhı-mádenı mura obektilerin saqtaý jáne osy taqyrypqa qatysty basqa da jobalar.

6. Birgemiz: Qamqor - qarttar úıinde, áleýmettik qyzmet kórsetý ortalyqtarynda jáne osy baǵyttaǵy basqa da jobalarda eriktilik qyzmet.

7. Birgemiz: Úmit - joǵalǵan adamdardy izdeý, apattar qaýpin azaıtý, tabıǵı jáne tehnogendik sıpattaǵy tótenshe jaǵdaılardyń saldaryn joıý, sonyń ishinde Uly Otan soǵysyndaǵy otandastarymyzdyń erlikteri týraly baıandaıtyn qujattardy izdeý jáne osy baǵytqa sáıkes keletin basqa da jobalar.

Erikti qyzmetin damytýǵa jáne qoldaýǵa granttar berý jónindegi komıssııa týraly erejemen myna silteme boıynsha tanysýǵa bolady.

Jobalyq ótinimder 2020 jylǵy 2 jeltoqsan saǵat 18.00-ge deıin myna mekenjaı boıynsha qabyldanady: Qaraǵandy qalasy, Qurylysshylar dańǵyly, 4, 205 kabınet.