Qaraǵandy oblysynda erigen qar sýyna úsh adam batyp ketti
QARAǴANDY. QazAqparat - Qaraǵandy oblysy Qarqaraly aýdanynda jol apaty saldarynan tasyǵan qar sýyna úsh adam batyp ketti, dep habarlaıdy «QazAqparat» HAA tilshisi.
31 naýryz kúni saǵat 20:00-de TJ departamentiniń kezekshilik bólimine «Qarashoqy-Besoba» jergilikti mańyzdaǵy tasjolynda «ÝAZ» avtomobıli erigen qar sýyna tolǵan jyraǵa túsip ketkeni týraly habarlama túsken.
«7 oryndyq mashınanyń salonynda 14 adam bolǵandyǵy anyqtaldy. Apatqa ushyraǵan kóliktegi on bir adam sýdan ózderi shyǵyp, jol ústine kóterilgen. Sýǵa ketken úsh adam izdestirilýde. Qutqarýshylar men tehnıkalar jumyldyryldy. Jol apaty kóktemgi sý tasqyny saldarynan bolǵan joq. Bul aýmaqta tasyǵan sýdyń bıiktigi nebári 10 santımetrdi qurady», - dedi Qaraǵandy oblystyq TJ departamentiniń baspasóz hatshysy Qýanysh Mútállapov.
Іshki ister departamentiniń mamandary jol-kólik oqıǵasyna qatysty tekseris júrgizýde. Aldyn ala derekter boıynsha, júrgizýshi rýlge ıe bola almaı, jyraǵa qulaǵan.
Qýanysh Mútállapov atap ótkendeı, «Qarashoqy-Besoba» jergilikti mańyzdaǵy jolynyń aýmaǵynda qosalqy jol bolǵan.
«Alternatıvti, qaýipsiz, sý tasqynynan qorǵalǵan jol bar. Barlyq avtomobıl júrgizýshileri osy joldy qoldanady. Júrgizýshiniń ne sebepti osylaı jasaǵanyn quqyq qorǵaý organdary anyqtaıtyn bolady», - dedi Qýanysh Mútállapov.
Apat jáne jolaýshylardyń shamadan tys kóp bolý faktisine baılanysty tergeý jumystary júrgizilýde. «Barlyq avtomobıl ıelerine ótinish: tasqyn bolǵan joldarmen júrmeýlerińizdi suraımyz. Bul ómirińizge qaýipti», - dep eskertti TJD baspasóz hatshysy.
