Qaraǵandy oblysynda erigen qar sýyna batyp ketken úsh adamnyń da denesi tabyldy
QARAǴANDY. QazAqparat - TJ departamentiniń qutqarýshylary Qaraǵandy oblysynda jergilikti mańyzdaǵy joldyń jyrasyndaǵy erigen qar sýynan úsh adamnyń, sonyń ishinde 13 jasar balanyń denesin tapty, dep habarlaıdy «QazAqparat» HAA tilshisi.
«Іz-túzsiz joǵalǵan úsh adamnyń barlyǵy sýdan tabyldy. Aıta óteıin, apattyń oryn alýy kóktemgi sý tasqynymen baılanysty emes. Aýmaqta tasyǵan sýdyń bıiktigi nebári 10 santımetrdi qurady», - dedi Qaraǵandy oblystyq TJ departamentiniń baspasóz hatshysy Qýanysh Mútállapov.
Eske salaıyq, 31 naýryz kúni «Qarashoqy-Besoba» jergilikti mańyzdaǵy tasjolynda «ÝAZ» avtomobıli erigen qar sýyna toly jyraǵa túsip ketken. 7 oryndyq mashınanyń salonynda 9 adam bolǵandyǵy anyqtaldy. Úsheýi iz-túzsiz joǵalǵan.
Aldyn ala málimet boıynsha, júrgizýshi rýlge ıe bola almaı, jyraǵa qulaǵan.
Buryn habarlanǵandaı, saǵat 13.00-de Qaraǵandy oblysy TJ departamentiniń qutqarýshylary kóktemgi tasqyn sýǵa batyp ketken bir adamnyń denesin tapqan edi.
Іshki ister departamentiniń mamandary jol-kólik oqıǵasyna qatysty tekseris júrgizýde. Bul aýdanda alternatıvti, qaýipsiz, sý tasqynynan qorǵalǵan jol bar. Júrgizýshiniń ne sebepti osylaı jasaǵanyn quqyq qorǵaý organdary anyqtaıtyn bolady.
