Qaraǵandy oblysynda erigen qar sýymen jaıylymdyq jerler sýarylatyn bolady
QARAǴANDY. QazAqparat - Qaraǵandy oblysynda erigen qar sýy jaıylymdyq jerlerdi sýarýǵa paıdalanylatyn bolady, dep habarlaıdy «QazAqparat» HAA tilshisi.
Qaraǵandy oblysy jer qatynastary basqarmasynyń basshysy Aıan Shalmaǵanbetovtyń aıtýynsha, erigen qar sýy jerdiń birrettik tereń ylǵaldandyrylýyna paıdalanylady.
«Sýdy bógetke jınap, 10-20 táýlik boıy ustaımyz», - dedi Aıan Shalmaǵanbetov.
Erigen qar sýyn kádege jaratýdyń alǵashqy tájirıbesi aldaǵy 2018 jyldyń kókteminde bastalady.
Osy ýaqytqa deıin erigen qar sýlary tasqyndar retinde qalalarǵa, aýyldar men aýdandarǵa mıllıondaǵan shyǵyndar alyp kelgen edi.
