Qaraǵandy oblysynda er adam toı korteji kóliginiń ústine minip bılegen
ASTANA. QazAqparat - Jelide toı kortejiniń jolda júrý erejesin buzǵanyn dáleldeıtin taǵy bir vıdeo paıda boldy. Bul joly oqıǵa Qaraǵandy oblysynda oryn aldy. Rolık Instagram jelisinde jarııalandy.
Vıdeony toı kortejindegilerdiń biri túsirdi. Kortej kólikteriniń biriniń memlekettik nomeri vıdeoǵa ilikti.
«Kóliktiń ústine shyqqany ne? Álde jurtty tań qaldyrǵysy keldi me? Ol kóliktiń astyna túsip, solaı birneshe shaqyrym júrip, keıin tap-taza, jaraqatsyz shyǵa kelgen jaǵdaıda men tań qalar edim», - dep jazdy paıdalanýshy nurgul.rakhim.
Sońǵy kezderi Qazaqstandaǵy toı kortejderiniń jolda júrý erejelerin buzýy jıilep ketti. Osylaısha, osy aıda Shymkentte qasaqana apattyń oryn alýyna jaǵdaı jasaǵany jáne qarsy jolaqqa shyqqany úshin bes júrgizýshige 10 AEK kóleminde aıyppul saldy. Jolda júrý erejelerin qaıta buzsa, kólik júrgizý quqyǵynan aıyrylýy múmkin.
