Qaraǵandy oblysynda epıdemıologııalyq jaǵdaı turaqtandy
QARAǴANDY. QazAqparat - Qaraǵandy oblysynda COVID-19 aýyrgandar emdelgen gospıtalderdiń kópshiligi jumysyn toqtatty, dep habarlaıdy QazAqparat.
Qaraǵandy oblysynda epıdemıologııalyq jaǵdaı turaqtandyryldy. COVID-19 aýyrǵandarǵa arnalǵan emdeý mekemelerindegi tósek-oryndardyń tolymdylyǵy 16%-ǵa deıin azaıdy. Endi barlyq kúshter kúzde kútiletin yqtımal ekinshi tolqynǵa daıyndyqqa baǵyttalady.
Zoom platformasynda onlaın ótken kezekten tys XLІ-sessııada oblystyq máslıhat depýtattary bıýdjettegi ózgeristerdi bekitti. Negizgi shyǵyndar densaýlyq salasyn nyǵaıtýǵa baǵyttaldy. Aýrýhanalar men emhanalar úshin jańa medıtsınalyq jabdyqtar satyp alýǵa qarajattar bólindi.
Oblys ákimi Jeńis Qasymbek epıdemıologııalyq jaǵdaı týraly baıandady.
«Búginde tósek - oryndardyń tolymdylyǵy 16%-ǵa deıin azaıdy – bul jalpy respýblıka boıynsha qaraǵanda 10%-ǵa az. Jan saqtaý tósek-oryndary 14,7%-ǵa toldy. Koronavırýspen aýyrǵandar emdelgen medıtsına mekemeleriniń kópshiligi jumysyn toqtatty. Ázirge jeteýi jumys isteýin jalǵastyrýda. Osylardyń esebinen biz dárigerlerdiń kóp bóligin bosattyq, olar barlyq aýrý túrleri boıynsha josparly gospıtalızatsııalaýǵa oraldy», - dep málimdedi óńir basshysy.
Jeńis Qasymbek iri kompanııalar men kásiporyndarǵa densaýlyq salasyna kómekteskeni úshin alǵysyn bildirdi. Ókimet pen metsenattar aýrýhanalardy jerlesterimizdiń ómirin saqtaý úshin barlyq qajettilermen qamtamasyz etýge qoldarynan kelgenin birlesip jasady, dep atap ótti.
Oblysta búginde 192 ÓJJ-apparaty, 1 500 ottegi kontsentrattary, 17 kompıýterlik tomografııa kabınetteri bar. Qazan sońyna deıin taǵy 500 ottegi kontsentratorlary, 1 500 pýlsoksımetr jetkiziledi, respýblıkalyq bıýdjet esebinen 151 ÓJJ-apparaty satyp alynady. Oblys qalalarynda bes KT kabınetterin qosymsha jabdyqtaý josparlanýda. Sonymen birge 40 tsıfrlyq rentgen-apparattary satyp alynady.
Óńirde qajetti emdik dárilerdiń bir jarym aılyq qory bar, dep tolyqtyrdy, oblys ákimi. «Saryarqa» ÁKK bazasynda dárilerdiń turaqtandyrýshylyq qory quryldy.
- PTR-zerthanalarynyń jelisin ulǵaıtamyz. Búginde oblys halqynyń shamamen 14%-y testten ótken. Qoldaǵy qýattar táýligine 4 500 testke deıin jasaýǵa múmkindik beredi. Jalpy epıdemıologııalyq jaǵdaı turaqtandyryldy. Biz yqtımal ekinshi tolqynǵa belsenli daıyndalýdamyz», - dep atap ótti, Jeńis Qasymbek.
