Qaraǵandy oblysynda eń úzdik ýchaskelik ınspektor anyqtaldy
QARAǴANDY. QazAqparat - Qaraǵandy oblysynyń ýchaskelik ınspektorlary arasynda ótken kásibı baıqaý úsh kezeńnen turdy. Oǵan óńirdiń 18 qalasy men aýdandarynan kelgen polıtseıler qatysty, dep habarlaıdy QazAqparat tilshisi.
Jeńiske úmitkerler qarý atýdan, dene shynyqtyrý daıyndyǵynan jarysyp, óz jumysynyń nátıjesin kórsetti. Baıqaýdyń birinshi kezeńiniń qorytyndysy boıynsha aqtyq saıysqa 21 ýchaskelik ınspektor ótti.
Saıys barysynda polıtsııa qyzmetkerleriniń zańdar men normatıvtik aktilerdi bilý deńgeıi tekserildi. Aqtyq saıysqa qatysýshylar «Ýchaskelik polıtsııa ınspektorlary qyzmetiniń ımıdjin arttyrý, quqyq buzýshylyqtyń aldyn alýdyń oń nysandary men ádisterin taratý» taqyrybynda esse jazdy.
Barlyq kezeńderdiń qorytyndysy boıynsha úzdik úshtikke Ulytaý aýdanynan Dıdar Aıdarbekov, Abaı aýdanynan Damır Japparov jáne Balqash qalasynan Bereke Satbekov ilikti.
Baıqaý komıssııasynyń sheshimimen Damır Japparov jeńimpaz atandy. Endi ol elimizdiń eń úzdik ýchaskelik ınspektory ataǵy úshin respýblıkalyq baıqaýǵa qatysady.
