Qaraǵandy oblysynda elimizdiń soltústik aımaqtaryna esirtki tasymaldaıtyn arna joıyldy
ASTANA. Naýryzdyń 3-i. QazAqparat /Aıdar Ospanalıev/ - Ótken aptada respýblıkada 1 myń 886 qylmys jasalyp, olardyń 1 myń 468-niń izi sýymaı ashyldy.
Sondaı-aq 379 buryn jasalǵan qylmys áshkerelengen. Bul týraly búgin jýrnalıstermen bolǵan brıfıngte Іshki ister mınıstrliginiń Til saıasaty jáne aqparat departamentiniń bastyǵy Qýanyshbek Jumanov málim etti, dep habarlaıdy QazAqparat.
Onyń derekterine qaraǵanda, apta ishinde izdeýde júrgen 130 kúdikti qolǵa túsip, 7 atys qarýy tárkilengen. «Sondaı-aq esirtkimen baılanysty 209 qylmys anyqtalyp, olardyń 53 faktisi esirtkini saýdalaýmen baılanysty boldy. Al zańsyz aınalymnan 50 keli esirtki alynyp, onyń 1,5 kelisi geroın boldy», dedi departament bastyǵy.
Onyń aıtýynsha, Kókshetaýda 5 keli marıhýanany saýdalaý barysynda Qaraǵandy qalasynyń 36 jasar turǵyny men jergilikti eki azamat ustalǵan. Olardyń biriniń úıin tintý kezinde 15 keli marıhýana tabylǵan. Sondaı-aq Qaraǵandy oblysynda elimizdiń soltústik aımaqtaryna esirtki tasymaldaıtyn arna joıyldy. Bul áreket boıynsha Temirtaý qalasynyń 35 jasar turǵyny ustalyp, onyń páterinen 6 keli marıhýana men 1,5 keli gashısh tabyldy.
